減肥妙法

莎莎國際主席郭少明尋日出席一個競步活動，見佢身形比之前清減咗，原來佢喺呢四年期間，足足減咗三十磅咁多。究竟郭少明有咩妙法？佢話個秘訣就係習慣將每餐嘅食量都減到以前嘅一半，例如以前食一塊牛扒，依家就只會食半塊。

郭少明講起減肥時就話，其實佢依家食嘢都冇刻意少油少鹽少糖，咩食物都照舊擺落肚，就算畀舊梅菜扣肉佢，佢都一樣照食，不過為咗減磅，佢食嘢時就會食少一半。咁剩低嗰一半食物點處置呢？郭少明就話：「畀老婆食囉」。郭少明又憶述，最初減肥時一開始瘦得好快，三個月就瘦十磅，但之後進度就慢咗落嚟，需要持之以恒。佢又話，試過買衫時專登叫店員畀細兩個碼自己，個店員仲以為佢開玩笑，其實係佢好了解自己貪靚嘅性格，買咗靚衫著唔落，就會逼自己減到著到為止喎。

-----------------------------------------------

我退休一年後，瘦左十磅！其實我並冇刻意減肥----刻意減左幾十年咯，體重咪一樣隨住年齡增長！

何解自己瘦？梗係要撇除左病嘅緣故先啦。

我自己認為要上班，便一日三餐響街外食，即使食嘅份量少(我一個飯盒食唔倒三份一)，但係外面煮嘅嘢油份多(更加唔知係咩嘢油)、菜少肉多(麥兜都話啦：食肉唔食菜，肥死你呀).......加埋加埋咪日子有功囉！

退休後，唔需要應酬(冇大茶飯食)，自煮每餐一碟菜加一種肉，間中煲吓老火湯(依家煲湯連鹽都唔落)、蒸魚唔落熟油，整好淋橄欖油.....又係日子有功......哈哈！咁就「無情情」瘦左。

做人真係「何必刻意求佳境，自有奇逢應早春」！