新不如舊
2015/11/02 13:57:00 網誌分類: 影視
無綫演員荒問題持續，而家啲電視劇集主角配角嚟嚟去去都係嗰幾個，新嗰啲演員又未成氣候。其實好多人都好掛住無綫嘅「那些年」，「那些年」嘅精彩電視劇，「那些年」嘅好演員。
日前，有傳媒報導指無綫已向離巢已久嘅藝人求救，其中廖啟智、唐文龍及苑瓊丹已答應回巢拍劇。去年廖啟智為港視拍攝劇集《選戰》贏得一致好評，回巢後即擔正做男主角，喺12月即將開拍嘅《律政強人》中仲會同方中信首次合作，演技大鬥法，好期待啊！唐文龍亦喺訪問中表示其實無綫呢兩年一直都有搵佢幫手，可惜一直都夾唔啱期。好多網友都覺得佢外表型格，演技又唔差，仲話好想快啲睇到佢嘅演出喎！
呢個雖然係好消息，但係新血係必須嘅！好似香港情況一樣，過多廿年，退休人士多過勞動人口，真係唔知點算？
尋晚「無線」播左個「分豬肉大獎」，睇兩睇唔對路：人人有獎，不分好醜---果啲好演技嘅同啲冇演技嘅齊齊獲獎，係我就唔去星架坡攞獎：有失身份！
頂佢唔順，轉睇明珠台，又係冇嘢睇！惟有早啲搵周公傾計。
尋日拎左啲果皮出去晒。呢啲果皮晒左三年架啦！晒埋今年就可以收埋佢等升值(發夢冇咁早！「哎呀大仔」話起馬要有廿年先值錢，我都唔知有冇命等)。晚上收左入屋放響我間房，成晚聞倒陳皮香。
尋晚出街食晚飯飲左杯奶茶，預左會失眠；但係居然好快入睡，仲一覺睡到天明添！唔知同啲果皮有冇關呢？(早前我響12/9/2015網誌介紹過：床前放橘子可安眠)
噓！又叉遠左。
無論任何行業，新血是必須的。問題是「無線」自從新管理層當政後，用人惟親！不論好醜，但求就手，所以搵晒啲港姐做女一；唉！港姐除左個樣得之外，演技欠奉；當然假以時日，會有一兩個可以脫穎而出也不定！但係響佢地未成氣候、甚至橫睇掂睇都唔似係有潛質嘅時候，晚晚監觀眾睇佢地，係咪虐待吖？
再者，近年選出嚟嘅港姐，好多連個樣都唔得(聽聞有位叫「豬扒」港姐喎)！不過，個樣唔得演技得都冇問題，張繼聰咪係一個好例子囉！
雖然依家套套劇都俾觀眾鬧爆，但係「無線」繼續我行我數---一來依家係一台獨大，你有本事咪唔好睇囉；二來據聞「珊姐」話之你鬧，最緊要有noise啫，有人鬧咪有人氣囉！
似乎藝人都好似果皮咁，磨練越久，演技越好、越襟睇！
回應 (0)
我要發表