我揀了，你揀左未？

還有一個星期，便是四年一度的區議會選舉投票日，已登記的選民，響呢幾日內會收到選舉事務處寄出的「投票通知書」，通知你於本月22日星期日，帶著這張「投票通知書」及身份證，到上面寫著的投票站投票。

即使你收唔倒此通知書，如果你肯定自己是選民，祇要帶同身份證，到所屬的投票站，一樣可以投票。假如你唔清楚投票站的地點，好簡單啫，問吓自己選區嘅候選人，佢地一定樂意告知---不過，最好唔好當日先問啦！一般而言，區議會選區細，所以每一選區通常祇設一個投票站；新界較偏遠的鄉郊地區，才會於一個選區內設多個投票站。

較早前，我曾經就「區議會選舉：我點選？」響網誌講左幾日；我梗係貫徹始終，照足我所講嘅「抽除法」決定揀邊位啦。

尋日收倒「投票通知書」連同候選人簡介。我的選區有四位候選人：

A君-----從未見過此人，報稱做「物流」，海報指某某人全力推薦—抱歉！我都唔知某某人係咩嘢水？

B君-----前為區議員，因犯刑事案判罪而失去區議員席位；去年「佔領」、「鳩嗚」樣樣關佢事；海報上寫著「癲狗全力支持」；報稱是「民主黨」黨員，但據知該黨冇推薦佢參選

C君-----「工黨」黨員，職業報稱為社區幹事

D君-----現任區議員，職業是工程師，屬工聯會

首先抽除嘅唔駛講都係B君啦！除左好事，佢樣樣做齊喎。

其次咪係C君囉。須知道：「社區幹事」其實並不等同是「社工」，社區幹事可以講係某些人為了鋪路參選議員，所以有正經工唔做，響議員辦事處做助手，藉著議員老板的身份，方便佢地接觸選民。工黨(現任主席涉嫌曾收「黑金」)？唔理佢推薦邊個，請便啦！

至於A君，唔識佢，冇選佢嘅理由！我近年聽得電台節目多，才知道「物流」呢份職業好廣泛，送外賣、貨櫃車司機…..都算係！

揀淨一位現任區議員。響佢在任果四年，我經常見佢現身區內，唔係淨係臨選舉先見人，同其他幾位比較，都唔駛點諗啦掛！

講真吖，揀邊個其實冇可能去到投票站才決定。如果你到果日都決定唔倒嘅，唔選好過選啦：與其亂投、不如唔投！