木水火
木水火
木水火

外國食油也造假 天下烏鴉一樣黑

2015/11/14 23:30:20 網誌分類: 外地烏鴉同樣黑
14 Nov

計太一叮話齋,求人不如求己,食品安全關乎人命,旨意當局把關都係嘥氣嘅嘞,最緊要自求多福,買食品時落足眼力,睇清睇楚,係咪!       相關新聞:意橄欖油 次級充貴貨

 外國食油也造假 天下烏鴉一樣黑

係人都知,兩岸奸商為禍,道德淪喪,黑心食品推陳出新,五花八門,大家早就見怪不怪。不過咁,如果以為黑心食品係中國人嘅專利,咁就錯喇,家陣連來路貨都未必靠得住,問你怕未。

唔係靠嚇㗎,意大利傳媒踢爆當地多個品牌嘅橄欖油懷疑貨不對辦,以次等橄欖油,充當最高級最貴嘅特級橄欖油,而且唔係個別事件,幾乎全線淪陷咁滯。意大利海關跟進測試,果然發現九款所謂嘅特級橄欖油有問題,都咪話唔得人驚。唔好以為唔關香港人事呀,部分涉事品牌已經流入本港。正如橄欖油業內人士話齋,市面上橄欖油種類繁多,除非親身品嘗,否則好難憑肉眼分辨,唔止普通消費者隨時上當,分分鐘連廚神都中招添呀。即係咁,消費者經濟損失事小,最怕次等貨隨時食壞人,咁就大件事咯。

天下烏鴉一樣黑,真係無講錯㗎。意大利作為橄欖油生產大國,因乜解究會淪落到以次充好呢?答案其實好簡單,咪就係奸商唯利是圖,當局監管不力囉。

正如當地農業專家話齋,由於特級橄欖油價格長期居高不下,以次貨充貴貨可以謀取暴利,完全係欺詐行為。所以話,殺頭生意有人做,蝕本生意冇人做,奸商見錢開眼,有乜嘢事做唔出吖,中國人係咁,外國人亦唔例外。

開講有話,製藥無人見,存心有天知。食品安全關乎人命,商人喺賺錢之餘,亦要顧及社會道德,事關黑心食品唔止威脅人類健康,仲會遺禍子孫,真係害人不淺㗎。

唔講唔知,遠在唐代已經有關於食品安全嘅法例,寫明食物變質,銷售者必須立即銷毀,否則要打九十大板。仲有呀,如果賣黑心食品食壞人,更加罪無可恕,唔理係生產商抑或銷售者,甚至連負責監管嘅官員都要上身,統統被處以極刑,殺無赦。古人治亂世用重典,反而依家嘅官僚放任黑心食品氾濫成災,簡直匪夷所思。講到尾,杜絕黑心食品非不能也,實不為也。

事實證明,全世界嘅官僚都係一擔擔,食安把關甩甩漏漏,每次都係後知後覺,例牌要等傳媒踢爆至識得跟進,等得嚟蚊都瞓蛇都死啦。計太一叮話齋,求人不如求己,食品安全關乎人命,旨意當局把關都係嘥氣嘅嘞,最緊要自求多福,買食品時落足眼力,睇清睇楚,係咪!

 

 太一叮    

 

   外國食油也造假 天下烏鴉一樣黑

   http://the-sun.on.cc/cnt/news/20151114/00416_001.html

 

回應 (0)
我要發表
user