鋤強扶弱？

香港人同情心氾濫，好嘅係此乃人之常情：正是惻隱之心，人皆有之！壞的是很容易被人利用，結果變成好心做壞事！

上星期去高山睇「騷」，遇倒一位多年冇見嘅曲友；記得佢上次(四年前)係區議會選舉候選人，最終落選。幾年冇見，咁啱區議會選舉在即，於是問：「今屆有冇參選？」

答：「冇囉！仲敢制咩？」

我：「哦！你上次參選係咪工聯會支持？」據我所知，佢同工聯會經常一齊攪活動。

答：「係就好啦！最慘唔係，最後係「？黨」(一個環保團體，現在經已唔存在)成班人話支持我；但係參選後，卻無一人協助，真係要自食其力！」自食其力？好吖！好仔不論爺田地吖馬。

我：「咁又係慘啲，如果工聯會支持，佢地一定會分配人手，唔會俾你孤軍作戰。」

答：「最慘係輸左選舉後，又因為「選舉支出」報數有問題，上左廉署解話好幾次。」

我：「嘩！區議會選舉經費幾萬蚊至喎，盤數有幾難？我幫立法會候選人做盤數，百幾二百萬都冇問題！」最緊要清楚條例、樣樣嘢有單有據啫！真嘅數難唔倒我、做假數難度高好多！所以識得做假數嘅會計師咪值錢囉！

講咁耐，想講咩嘢啫？

咪係想講：參選冇政黨支持好辛苦囉！政黨有的是錢：真金又好、黑金又好，總之金錢雖非萬能，但係參選就無財不行！

我個選區其中一位候選人：雖然聲稱屬於某黨，但係據知某黨並未推薦佢參選，當然亦唔會撥款同撥人幫佢手啦；所以佢參選以來(未參選當然人影、鬼影都唔見啦)，我祇見其刀旗(又稱直旗，挷在路旁欄杆的旗)、不見其人！

尚有四天便是選舉日，終於見倒佢「浦頭」啦！簡直係「老人與旗」---「一支公」託住啲旗，一枝枝梆在欄杆上；跟住又一個人「企街」派單張。(選舉條例：見旗唔見人係違法架！)

奇怪的是：所謂「曹操亦有知心友」，難道佢衰到連一個朋友都冇？

響冇政黨支持下參選，首先要考慮吓財力與人力。

財力方面，參選區議會區區幾萬蚊，唔難(有正當職業，問銀行借都借倒、冇正當職業，問「財仔」借亦唔荒借唔倒)！如果要賄選，咁就多多都唔夠。

人力方面：我假設每個人都有朋友。要參選，晨早便要跟朋友打定招呼，請佢地響參選呢一兩個月幫手，計清楚自己有足夠人手，才好參選！

須知道：即使你有十多廿人幫手，唔等如你有呢十幾廿票，因為佢地唔一定係你嘅選民！但係如果連十幾廿個幫手都搵唔倒、甚至係一個幫手都冇嘅，可唔可以斷定呢位仁姊經已眾叛親離呢？抑或佢識嘅都係f a c e b o  o k朋友，淨係可以纸上談兵？

雖然種種跡象均顯示佢係完全冇可能獲勝，但係實情又未必。何解？咪因為香港人太有同情心囉！一來喜歡鋤強扶弱、二來抱住玩吓嘅心理！選「長毛」都係咁嘅心態---有人鐘意睇人做「騷」！有人唔希望一面倒！但係一面倒又有咩嘢問題？今次選舉就係要清楚告知果班嘢：佢地嘅想法、做法都不獲普羅大眾認同！