冰菜炒豆豉魚柳

 我十一月十五日網誌介紹「蒜茸炒冰菜」，當時我覺得冰菜味道偏淡；上次我從賣有機菜的菜檔買，廿六蚊斤，我買左半斤十三蚊。

今日見「祥興」有得賣，而且好靚仔，用透明膠盒裝著，八蚊一盒，十五蚊兩盒。我問菜販一盒有幾多？佢竟然話唔知！今時今日咁嘅服務態度真係....結果我買左一盒，返閨開嚟睇，份量同上次差不多，即係半斤左右----盒外冇寫重量，反而英文描寫著冰菜含有多種維他命和礦物質。

既然我上次覺得淡，今次嘗試用罐頭豆豉魚柳煮。我未用過呢隻罐頭，所以開嚟試過，佢都唔係幾咸，較朱江橋牌淡好多！

材料：

冰菜約半斤

一小罐豆豉魚柳

豆豉魚柳原罐用叉叉爛魚柳，倒入鑊爆炒一會，放入冰菜略炒見轉色即可。

註：

一. 視個人口味加鹽、糖或魚露調味。

二. 冰菜有點像吃刨冰---脆得嚟唔硬，啱晒老人家食！