勿睇錯攤皮

睇錯攤皮做錯騷

八條細路今撈粗

陰溝裡面撐船過

有命來之冇命途

過氣單位領導人古董在驅異會大選前指出、本城面對嘅問題就係年輕人不認識祖家、以致現任單位領導人乜都做唔到。呢嗱、古董一開口就將年輕人講成敗家仔。咁搞法、班友聽完之後唔起晒槓才怪啦！係嘛？難怪古董當年咁有勇氣、都要腳痛收皮啦！俗語話齋、一隻手掌係拍唔響嘅。點解總係有人將年輕人嘅反叛視作為無知、而從不肯認真分析一下箇中原因嘅呢？難怪周不時都報錯數啦！喂喂、古董呀、古董、你講嘢則埋一邊、究竟係想和諧、抑或係想河蟹架？

呢嗱、講多無謂、行動最實際、今屆嘅驅異會選舉結果就話咗畀古董知、年輕人唔係咁簡單嘅。雖然機乎所有激進幫派都在本屆驅選之中全軍覆沒、但初次參戰嘅傘兵卻取得8席、再加上陀地派嘅老字號奀童盟創造出16人參戰15人勝出嘅驕人成績看來、誰也不敢輕視年輕人。其它曾經高調參與戰中嘅飯盟黨派如白鴨黨、大撞黨、盟協等雖然都有大老墮馬、而且飯盟嘅整體成績更加係乏善可陳、但年輕參戰者嘅勝出尚可力保不失。相反、亂制派嘅總成績與上屆相比就顯然係遜色了！憑呢個結果睇得出、選民對於那些口水多過茶嘅政壇明星已感厭倦、所以寧願將手中一票投給充滿朝氣嘅年輕參選者。江湖傳聞顯示、傘兵之所以能夠上位絕非僥倖、因為他們在戰中落幕之後馬上被安排到指定地區開拓地盤、終於在選戰中一舉奪得八席。傘兵在這一仗裡面、唔止令到亂制踩地雷、甚至連某些飯民黨派亦陰溝裡翻船、的確係贏得相當漂亮。今次事件亦反映出、若不是將陀地派和傘兵所贏得嘅議席入埋傳統飯民數嘅話、大輸家就是他們。由此看來、在往後嘅日子裡面、飯民嘅陀地意識勢必有所提升矣！