雙料變雙失！

走得入政治舞台，梗係希望能夠更上一層樓，由區議員「升呢」做立法會議員，最好就係兩樣都做埋啦！津貼雖然未至於收雙份，但係都足令人眼紅。

雖然議員所收的算是津貼，不是薪酬，但實際上唔少區議員真係當呢份係工，-諗住打過世架！問題係一旦落選，咁就「權」、「財」兩失；人到中年，想正正經經搵過份工打就難啦，有邊個樂意僱用一名過氣區議員/立法會議員？所以政治舞台，個人認為祇適宜有錢人、或者老豆大把嘅人參與，咁先至冇後顧之憂。

大約廿年前，香港有一段時期經濟低迷，很多大學畢業生後找不到工作，有人便選擇參選區議員；在我認識的區議員中，便有些是從那時走入政壇，至今仍是區議員一名；好彩佢咁於平淡，冇諗過參選立法會，咁多年來都在同一區內默默耕耘，所以剛派出嘅成績表，佢未來四年都有得撈-----如果一支公，咁就餓你唔死、飽你唔親嘅，如果要養埋老婆仔女嘅，咁就……

如果呢位仁兄有大志，參選立法會、甚至當選，佢可能會風光四年，但之後又如何？馮檢基、何俊仁、鍾樹根、葛珮帆最終咪一樣墮馬！

今次有以下幾位現任立法會議員參加區議會選舉，包括：

馮檢基、何俊仁、鍾樹根、葛珮帆、梁美芬、涂謹申、謝偉俊、王國興、田北辰、李慧琼(希望冇遺漏啦)

結果前四人均墮馬，而梁美芬與涂謹申僅屬險勝，保得住議席，但對手祇是選舉新丁，來年如果再選立法會可謂岌岌可危；至於李慧琼，我覺得佢勝出祇因對手太弱---兩位對手，每人攞得百幾二百票，簡直羞家！兩位對手其中一位近年逢選舉必參選：屢選屢敗、屢敗又屢選！可能大家會奇怪每次參選攞得咁少票，佢冇自知之明咩？

唔講大家未必知，正所謂醉翁之意不在酒。

上星期約左銀行經理傾計，做咩嘢？度水囉。

在等候辦理手續期間，經理問我：「我見有位現職律師嘅大學同學參選區議員喎(街度掛左宣傳橫額)，做區議員好高人工咩？」

我答：「你都知啦，香港有幾個行業係唔可以公然賣廣告嘅(律師、醫生...)；但係參選後，呢啲人就可以在選區內廣泛宣傳，駛幾萬蚊(選舉經費)就可以達到目的。佢地志不在當選，志在賣廣告啫！」

除此之外，亦唔排除有啲係精神有問題，既唔照鏡、亦唔照盆水嘅人士。

如果要做好一份工，淨係做區議員都夠你忙，更莫說是雙料議員要兼顧埋立法會果份。論津貼，立法會果份梗係好好多啦！既然如此，遇著兩者時間有衝突，梗係捨區議會而揀出席立法會活動啦！久而久之，選區佈居民見你唔倒，好容易俾人乘虛而入架！所以我奉勸大家，要嗎便祇做區議員、要嗎便祇做立法會議員，力不到不為財，做人唔可以太短視-----今次雙料、下次雙失！

但立法會議席有兩個是經區議員互選出嚟，咁佢地必須要當選區議員、才有資格循此途徑入立法會，所以馮檢基同何俊仁下屆咪冇得循呢個途徑成為立法會議員，變成雙失囉！