利強記老闆教你自己整神級雞蛋仔秘方大披露

2015/11/26 10:11:06 網誌分類: 生活

26 Nov

        利強記北角雞蛋仔，榮獲米芝蓮推介，蜚聲國際，Kelly每次路過，都乖乖地排隊買一餅來吃。昨天又去買，踫見利強記嘅廖老闆，小妹不恥下問，如何烘培一底完美嘅雞蛋仔？廖老闆好好人，把秘方和做法大公開，《頭條》讀者不妨試吓自己嘅手勢。

        廖老闆同小妹講，每早喺工場調校好一桶桶蛋漿，新鮮運送到各門市烘焙。他披露，一次過調校四百桶蛋漿嘅材料，《頭條》讀者不妨照比例試吓，大家記住一定要用北京雞蛋，取其蛋味香濃。睇落材料好簡單，但落幾多水呢？廖老闆就留有一手，話適量啦，其實好考經驗㗎。

        至於烘焙手法，更加考人，首先蛋漿份量一定要剛好覆蓋一邊嘅烘焙夾，合起烘焙夾後，只能反轉一下，令蛋漿平均分佈兩邊，令雞蛋仔半邊空心、半邊有餡，食落才會外脆內軟，而合上烘焙夾後約七至八分鐘，要握一吓手柄，「感覺」內裏有沒有彈力，如果不反彈，即是雞蛋仔已經烘熟，可以起出，放在吹風機吹數秒，即大功告成。

        廖老闆仲話，烘焙夾是度身訂造的，一邊發熱線維持四百度高溫，另一邊夾在爐上燒，以控制溫度，才能做出別具口感嘅北角雞蛋仔。而雞蛋則堅持用北京蛋，蛋味較香較滑，看來一底十多元嘅雞蛋仔，係廖老闆畢生絕技，易學難精，大家努力試吓啦。

        造400餅雞蛋仔成份

        材料份量

        麫粉 40公斤

        雞蛋漿 6公斤

        糖 15公斤

        水數桶(老闆不公開)

        KellyChu