取消「代議政制」，一天光晒！

想當年(一個人老左，就鍾意當想年架啦)，香港仍是英國殖地，政府施政基本上暢行無阻。

當年祇有立法局，議員皆由政府委任。議員外藉人士居多，最叻咪出左個鄧蓮如爵士囉！不過，結果都嫁左外國人，依家做埋英國上流人。

英政府臨走前，攪出個所謂「代議政制」喎！好聽啲係還政於民---不過，就要響佢地全面徹退，香港正式回歸中國後才做到議員全由直選產生，幾惡毒吖！

原本以為回歸後，中國人管中國人會好好多，可惜吖！好多香港人明明外表係中國人，內裡卻是白心，所以唔肯認自己係中國人！既然唔認係中國人，咁就可以「老奉」咁攪亂香港。不過，英國/美國人除左多謝佢地幫手攪亂香港外，會唔會當佢地係英國/美國人呢？

依家通街都係議員，仲每四年有區議會選舉，每四年又有立法會選舉，偏偏兩者又唔係同埋一年，所以每遇臨近選舉年，一個二個便惟恐天下不亂，咩嘢都將佢政治化----尤其是果啲平日唔見人嘅大懶蟲，更加要趁呢啲時間「浦頭」，俾選民知道佢尚在人間。

政府每年撥給十八區區議會唔少錢，結果做成各家自掃門前雪----一個萬幾人嘅選區有幾大吖？咁多錢可以點駛？結果咪百二萬響深圳豎立隻塑膠燒鵝(幫當區燒鵝店宣傳)、三步一小休憩處、四步一大休憩處，再唔係嘅，咪起啲又阻掟、又冇實際用途嘅小巴/大巴有蓋候車處囉！此外，咪攪燈飾囉，動輒駛幾百萬。

個人認為冇左十八個區議會，政府仲可以宏觀咁研究地區設分佈。

依家有立法會又如何？政府施政有順利過咩？佢地得閒響議會度掟嘢(衰過地踎流氓)、得閒又拉吓布....除左浪費納稅人錢之外，我睇唔倒立法會對社會有咩嘢貢獻！除左果幾隻專門攪攪震嘅嘢之外(佢地攪完事就被趕出議會，出去煲煙雀局)，我都好同情其他議員嘅---儘管無事可為，日日非法禁固你十幾小時都好攞命架！人生有幾多個十年啫，咁嚟嘥？

所以，計我話：一於取消呢個「代議政制」啦！

納稅人慳番好多錢：立法會/區議會議員津貼、呢班議員地區辦事處津貼、立法會/各區區議會職員薪津、十八區每年撥款，選舉事務處支出....反正過多廿年，香港老年人多過勞動人口，慳番啲錢做老人服務好過啦！