套丁

套丁不套丁

習慣當時興

行前先上岸

後者眼矎矎

近日「套丁」呢個詞語在江湖上熱起來、細聽之下才知到原來係買賣丁權圖利咁解。據說所謂套丁、即係有些邊疆居民（疆民）把丁權賣給某人、而某人又把手上嘅土地、名譽上轉讓予當地疆民、然後再由他們以自己名譽向縣府申請在該土地上興建丁屋。至於套丁呢個名詞出於何處、在下就唔知到。但係買賣丁權呢四個字就聽得唔少。不過咁、類似嘅丁權買賣交易、其實係持續超過四十年之久、但今次就有人被請去坐兩年半至三年花廳矣！正如某疆民長老質疑、在前朝都係咁做、點解要等到今時今日才拉人兼封艇呢？

在下曾經在榕樹頭聽講古佬講過、前朝督爺為着發展邊疆便以丁權丁地建丁屋為條件換取疆民支持、所以當時嘅講府對丁權買賣一向都係隻眼開隻眼閉嘅。當大歸之後縣府也在這個問題上一直瞓捩頸。但係唔知點解、前任前任縣太爺在臨老走之前、忽然之間發難、派遣好打得大總管去邊疆嚴查丁屋僭建問題、而跟疆民鬧翻。有傳聞指、可能係今屆縣太爺在上任前、被邊疆嘅一場「黑影飯局」瀄到咗個身、仲機乎跣到攤攤腰咁滯。自此每當他一想起邊疆飯局就揗雞到全身標冷汗、所以一直跟邊疆長老保持一定距離、以免又再被人瀄濕個身。就係咁、縣太爺與疆紳之間就搞到冇兩句囉！最近疆事會方面有風聲傳出、話疆民要擺脫縣府擁躉嘅形象、並組織疆民黨加強他們嘅議價能力。據說、今次疆事會嘅目的、就係要向有關當局投石問路。但當局卻以嚴打套丁作為回應。若然話、呢啲係縣府要跟疆民過唔去、恕在下不敢苟同。如無猜錯的話、嚴打套丁只是遊戲嘅開始、而縣府所做嘅一切、亦只不過係奉旨行事而矣！