金針木耳炆雞翼

注重健康嘅朋友，視雞翼如洪水猛獸，避之則吉。我食雞唔食雞皮，但係食雞翼冇可能唔食雞皮！不過，自己安慰自己囉：又唔係日日食，食食又何妨呢？雞翼唔健康啫，木耳健康吖馬，唔知可唔可以拉上補下呢？

我用了壓縮黑龍江黑木耳，之前經已介紹過，當係云耳咁用，一小包我可以分兩次用。

材料：

雞中翼6隻

壓縮黑木耳半包浸開

金針一小撮略洗，用熱水浸開

蒜頭兩粒略拍

一. 雞翼下蠔油、生抽、糖、麻油生粉醃一小時，略煎兩面取出。

二. 燒油爆蒜頭，下木耳、金針爆炒；加入雞翼，灒酒，下適量水，蠔油、老抽、生抽調味煮滾，收細火炆十分鐘。

三. 視需要而埋芡。