止流鼻血方

忘了曾否介紹過「酸味頭止鼻血方」。

我小時候，曾經因為食左三粒荔枝(三粒荔枝把鬼火)，結果攪到天天流鼻血，中西醫都睇過都醫唔倒----行又流、坐又流、最慘係瞓瞓吓覺都流：鼻與喉相通，所以成日都要飲血！

最終，有人介紹用「酸味頭」(要搭賣生草藥嘅婆婆上山搵)，加瘦肉同蜜棗煲水飲，一劑便解決了問題。

「酸味頭」難搵，多年來亦冇朋友有咁嘅需要----咁咪好囉！不過，得個「知」字旁吓身都好吖。

今早去買桔餅、龍脷葉再煲(呢啲天時飲多一兩次都冇所謂，反而唔得閒煮飯)。當時有位顧客幫婆婆買左好多新鮮粟米芯，佢離開後我多口問婆婆：「買咁多粟米芯有咩嘢用？」

婆婆：「佢啲孫仔成日流鼻血，我教佢每星期買兩斤粟米芯煲水俾佢地飲，飲左冇事，佢咪成日嚟幫趁我買囉！」

我：「祇係用粟米芯一樣？」

婆婆：「係呀！如果想好飲啲，咪落少少冰糖囉！」

雖然此方我未試過，不過真係有需要嘅朋友又不妨試試---粟米芯都食唔壞人啦！

婆婆話：「小朋友成日食埋啲煎炸食物，所以好容易流鼻血。」咁即係話粟米芯係清熱架啦！寒底嘅朋友小心服用呀。

註：

粟米，每部份也具藥用療效，有益健康又美味。

「粟 米 粒 可 健 脾 、 開 胃 、 利 尿 之 外 ， 粟 米 衣 、 粟 米 鬚 及 粟 米 心 亦 各 有 療 效 。 基 本 上 粟 米 性 平 和 ， 沒 有 禁 忌 ， 男 女 老 少 都 適 用 ， 但 陰 虛 火 旺 之 人 則 不 宜 進 食 爆 榖 ， 恐 怕 會 助 火 傷 陰 。 而 用 連 衣 連 鬚 粟 米 來 煲 湯 、 煲 茶 ， 比 起 單 吃 粟 米 粒 療 效 更 佳 ， 皆 因 粟 米 心 有 利 尿 的 作 用 ， 粟 米 衣 能 清 熱 、 解 毒 ， 而 粟 米 鬚 性 平 和 、 味 甘 淡 ， 除 了 有 利 尿 、 清 熱 的 功 效 外 ， 更 有 利 膽 作 用 ， 能 促 進 膽 汁 排 泄 ， 減 少 膽 色 素 含 量 ， 並 適 合 有 水 腫 之 人 食 用

記得連埋啲鬚一齊煲呀！