網友相見歡
2015/12/15 18:32:15 網誌分類: 生活
尋晚我地網友聚會。聚會有咩嘢好做?不外乎吃喝啫!我地係寫「雅虎網」時神交嘅,「雅虎網」冇左之後,大家迫遷到「頭條網」,不經不覺都有三年咯---左三年、右三年,這一生見面有幾天.....
今次約埋去紅磡「寶哥」食火鍋。我其實唔鐘意打邊爐架,因為自己係熱底(總好過係寒底吖),怕熱氣、喉嚨痛;呢間食肆除外,因為食物新觧、有質素,最多食完拍幾粒「清肺益火片」(又係「華山三寶」之一)嘅啫!
我地今次六個人,叫左:
一. 番茄牛尾湯底---好好味呀!我建議大家先試飲吓「頭啖湯」,誰知一個二個要添加(唔係「無添加」至好嘅咩),攪到都未開始灼嘢食,經已要加湯!靚豬最叻,一早夾左舊牛尾食啦(一個湯得兩舊咋)、跟住一個二個番茄呀、粟米呀咁....變左清湯:
二. 本地牛肉:M幾和牛我試過,不過我都係建議食本地牛肉,一來便宜、二來和牛比較油膩。一碟有十八至二十片:我地叫左兩碟。
三. 日本豚肉:口感有啲似豬頸肉,好爽!
四. 炸響鈴:真係就晒我地,樣樣嘢都係六件,唔駛我地「劃鬼腳」
五. 雜菜拚雜菌
六. 鯪魚丸:好味!
七. 手打墨魚丸
八. 蝦膠釀油條
九. 芋頭
十. 蓮藕
十一. 粉絲
十二. 出前一叮:兩客
六個人兩個墟,由六點半食到九點半,意猶未盡,一於移步過隔離「豬仔糖水」繼續吹水......食糖水都吹左個幾小時!好彩尋晚係閒日,侍應安排左我地坐響入偏廳(遠離大堂),冇人見倒啫,如果位位客人好似我地咁,呢間店就死得啦!如果我地幫趁前面街果間「芝麻綠豆」食,肯定俾人地掃走------果間頂籠坐倒半小時,你見佢人山人海,人地唔趕,你都唔好意思坐落去啦!
實在有說不盡的話題,我地越見越密啦----初時一年一次,後來半年一次,最近三個月一次,今次見完,下個月又見啦!又做咩嘢呀?咪又係食---民以食為天吖馬!
食埋個麵已經好滿足!平時我食火煱,會在將近滿足時食粟米的!
睇吓都好吖!
恨,恨,恨!恨冇得參加呀!
我都鍾意食本地肥牛多啲,無咁肥,不過豚肉我就麻麻哋,只係我個人唔多鍾意,因為真係太似豬頸肉(我唔鍾意食),有種一口油的感覺。