一個傻婆遊工展

2015/12/16 06:55:07 網誌分類: 生活
16 Dec

尋日要去天后覆診,反正睇完醫生都冇嘢做,一於過隔離行工展會。我份人好有計劃,早一晚寫定有啲咩嘢會買,無謂行嘥啲腳骨力。

今次最主要係想買個康寧煲。平時行永旺(前吉之島)都有呢個牌子賣,問題係價錢好貴、亦要成套買,錢固然係一個問題,我要成套嘢都冇用!

其實我曾經有一個特大同一個中等size嘅煲,用左廿年,中等大果個爛左(用左廿年,都算係咁啦),大果個依家人少又冇咩嘢用,而且用左成廿年,即駛佢唔爛、我都唔敢放上明火煮。

一入去工展會經已搵倒「康寧」個攤位,但係我想要果個煲原來要買左其他嘢,先可以用$299嚟換購,咁一於諗吓先啦!

原本都想買食油同蠔油,我用開嘅牌子都係買呢樣、搭果樣....為左條鞋帶累身家嘅嘢,唔啱我!講真吖,太重嘅、我又拎唔倒;好多嘢其實冇咩點便宜:好像「余仁生」咁,我樓下鋪做緊九折,工展會八八折,都懶得拎啦!又好似「念慈庵」咁,三枝大嘅$106,送兩三小包喉糖之類嘅嘢,出面賣$36一樽,真係冇必要響度買。

不過,入得去唔買嘢咪連十蚊入場劵都餂埋(證明我未係長者)!

好彩:臨走前再去「康寧」個攤位問,今次另一位售貨員話唔駛我換購,可以直接賣俾我;何解?佢話因為剛剛有客買左嘢、但放棄左個換購權,所以益我!呢個煲冷熱都用得,保用十年:

{#IMG_20151215_154313_1.jpg}

響同仁堂買左啲成藥看門口;同時買左啲保心安膏同油,呢樣嘢我以前都提過,係我地「華山三寶」之一;不過,我一向唔喜歡揸藥油,最近才知佢嘅功效同埋親身體驗過,所以又買嚟看門口囉!

{#IMG_20151215_154411_BURST1.jpg}

幾個湯包:

{#IMG_20151215_154353_BURST1.jpg}

口立濕:我唔鐘意食咸濕嘢架,黃皮則例外!呢個牌子信得過,特別係佢嘅湯包,不過較其他牌子貴!

{#IMG_20151215_154546.jpg}

咁就混左一輪桔啦---頭尾個半小時。離開時見倒好多團體帶長者嚟,領隊囑咐隊友一個小時後在門口集合;我咁有計劃都要行個半小時,一個小時?做得咩嘢呀?

回應 (2)
我要發表
2015/12/17 08:42:56 回覆

一個人、搵啲輕便嘅嘢嚟買,算係咁啦!

2015/12/16 09:15:31 回覆

都幾好收穫!

user