兇兆

退左休之後，竹戰多左！我講嘅多，其實係個多月打一次啫，加上又唔係睹身家，正牌衛生麻雀；再者，我命中注定冇橫財命---所以我見倒啲「政棍」收「黑金」，咪憤憤不平囉！

不過，唔打麻雀、行出街都會破財，操曲一樣破財....咁即使次次竹戰都輸，一般都係輸三四百蚊啫；我地抽水食飯，幾百蚊玩成日包埋食喎，抵到爛啦！期間仲可以揶揄吓啲豬朋、又可以收吓風.....

尋日威啦，頭威頭勢，呢世人都未試過：自摸十三么呀，食十番！真係要果隻有果隻，好邪呀！心諗：今次仲唔一洗前恥，吐氣揚眉？

唉！做人真係唔好做得咁盡，招天衍架！

跟住果八圈輸死人呀！結果.........輸左八百幾，食完飯分番一百蚊水，淨輸七百幾！

豬朋又揶揄我啦：咁都叫做曾經風光過吖！

唔好意思，我都係鍾意細水長流：鋪鋪食三番夠架啦---山大斬埋有柴吖馬！我唔想做石堅呀。