典型「黃絲」性格

2016/01/04 08:36:15 網誌分類: 教育
04 Jan

我每星期伴奏班下課後,通常會跟幾位同學去酒樓飲茶;早期我都冇去,因為熟悉我嘅朋友都知道,我中午通常唔食嘢,飲茶更非我所選!久而久之我都隨俗,我冇咩點食嘢,不過夾幾十蚊當傾吓計、吹吓水,冇所謂啦!

我地上課地點是旺角,前年「佔領」期間,很多同學都因為旺角被非法佔領而要轉多次車才可抵達上課地點;所以,那次飲茶時,很多同學對「佔領」行為表達不滿,那天我們才知道原來我地班同學之中,有一位是「黃絲」支持者(明顯唔係主流啦)。

當日,她見其他同學均表達不滿,於是倖倖然發表她的偉論....隨著其他同學又表示不滿....結果差點不歡而散!我見那時氣氛很差,即刻打圓場---叉開話題,才化干戈為玉帛(註一)!

自此以後,我們飲茶便祇談曲藝,不談政治!其實我地都好少講政治,那次是咁啱有的才放矢啫(註二)!

一年前,因為我們這一班與對上果一班,同學數目均減少左,老師曾經問過兩班同學意見,企圖兩班合併,結果係:上果一班唔肯落嚟我地呢班、我地呢班又有兩位同學因種種關係,唔可以提早上課,咁咪不了了之囉!

最近,我地果班又有兩位同學因健康理由退學。我留意倒呢兩位便是去年表示不能提早上課的同學,於是在飲茶時,徵求同學對合併兩班的意見,大家都認為合併對老師有利、對我地無損。不過,老鼠要防避貓,要掛個響鈴響貓嘅身上,都要有隻老鼠肯自告奮勇,冒險同隻貓掛個響鈴架!我咪應承左做呢隻傻老鼠,同老師商量囉!不過我講明,老師如果同意,便要將呢個意見當係佢個人意見向兩班提出(基本上,除左班長,我經已問勻晒,大家都冇異議),唔好話係我提出。原因係:早兩星期班長攪左個「騷」,想我參與,結果我拒絕左;跟住呢兩個星期,我發覺佢對我嘅態度明顯有變,我唔想響風頭火勢之時,再俾佢誤以為係我有心攪到佢連冇班長都冇得做-----兩班合併,梗要減少一位班長架啦!

當時,支持「黃絲」的同學答:「駛咩嘢理佢咁多啫!」

另一位同學即時回應:「咁都要理吓人地感受嘅!」

-----------------------------------------

今早買餸,我到附近醬園諗住買件南乳炆羊腩。當時有位年輕女士正在買嘢,但見佢買左半斤花生後,諗左一輪,又要買四兩話梅...跟住又諗(睇吓仲要買咩嘢掛?)......當是鋪內得一位女店員,我咪企響度等囉!

另一位婆婆走入嚟,好熟手咁在鋪內一角取了一件南乳(獨立包裝,每件九蚊),俾十蚊叫阿姊找俾佢。

阿姊見果位女士仲諗緊買咩嘢,於是便找錢給婆婆;我既然知道放南乳的地方,於是又自己取了一件;我一早拿住張十蚊鈔票、但我冇叫店員招呼我先架;店員見果位阿姊仲諗緊,所以便找回一蚊給我。誰料那位年輕女士暴跳如雷,指著店員大罵:「咩你地間鋪邊條例話可以打尖架?」店員無奈,望住我苦笑!我頭拎拎望住佢---真係愛莫能助!冇必要同呢啲咁嘅人理論啫。

其實由頭到尾我都冇諗過要打尖。如果係我,知道自己要攪一段時間,而當時又有其他客買嘢,我都會叫店員招呼左其他客人先。當時因為佢根本唔清楚自己仲要買咩嘢,店員又見其他客祇需找續,才先招呼其他客,何錯之有?

依家啲年輕人總是自以為是對(唔代表其他人認同佢係對),便得勢不饒人;呢個世界咪因為多左呢啲咁嘅人,攪到唔太平囉!

早兩星期果集「愛回家」,內容係講「麥包」演父親的角色,事事讓人(即使理由在自己一邊),於是成家人均覺得佢冇「吉士」;其後當大家知道佢因何會有此表現後,便認同佢做事的方式----即使道理在自己一方,如果樣樣跟人家拗、企硬...最終影響嘅可能係自己、甚至令自己一生抱憾!

何況,今次事件,道理亦不全在那位仁姊一方!佢地駛唔駛理吓別人感受架?

可惜我唔係老板,如果係,我會同佢講:不如你企埋一邊,諗清楚想買咩嘢,一次過講啦!

當然,佢可能以後唔再幫趁;冇所謂吖,有麝自然香-----啲咁嘅客,阻住人做生意,少個未為少!

註:

一. 化干戈為玉帛:比喻使戰爭轉變為和平

二. 有的放矢:言之有物意思

回應 (1)
我要發表
383383
383383 2016/01/05 06:57:37 回覆

好明顯,這位女士,根本就唔知自己想買甚麼。

試問,一間非超市形式的小鋪,一人小店,又怎可以像超市般,逐個等你諗來諗去來交易?超市都是你選好晒才一次過俾錢的啦!

叫這位小姐,去超市買吧啦。

user