紅磡:皇朝私房火鍋

2016/01/08 08:09:13 網誌分類: 講飲講食
08 Jan

潮流興火鍋,不過唔係大家熟悉嘅打邊爐,而係蒸餾火鍋。姪女睇左「夜宵磨」介紹,所以去一試。

呢間「皇朝私房火鍋」在紅磡崇志街(應該仲有好多分店),與「加太賀」祇是一街之隔;門外海鮮缸內放滿各式各樣海鮮,有平有貴。

門內亦放著一盆盆海鮮,主要是蜆、花甲(花甲類都有好幾種)、蟶子、日月貝、扇具(=紅磨鏡)...

鋪面唔大,約放左十張檯,另外見有一房間放著一張大檯,我諗算係貴賓房掛。

此店主打係食海鮮啦!唔食海鮮嘅就免啦。檯上放左幾張紙,除左係各款海鮮與價錢外,亦放著一張寫上唔同嘅海鮮需要蒸煮的時間:

除左海鮮係必點嘅之外,還有小食可供選擇:

牆上貼上到訪藝人照片:

 

每檯均放上蒸鍋一個。我地剛坐下,便有店員拿著一碗米放響度:我:「我地未點嘢喎!」

店員:「因為煲粥需時,所以要蒸住先。」正一大鄉里(話我自己呀)---入得嚟,一定要幫趁食火鍋啦!難度淨係叫小食咩?

下面個蒸鍋,底層係放米嘅,上面個蒸格鋪上一片荷葉(咁蒸出嚟嘅嘢同埋啲粥咪有荷葉香囉),咁蒸海鮮嘅水滴落啲粥度,啲粥咪又有海鮮嘅鮮甜味囉:

我地點左:

一. 花甲公:一份約有十隻

花甲蒸好左,姪女問有咩嘢醮料?店員:「我地主張原汁原味, 所以冇醮料提供!」原汁原味?淨係啱我至喎!

姪女食慣重口味(麻辣火鍋,真係無辣不歡架),正在不知如何是好的時候,一位女士(我相信係老板娘)走埋嚟,問姪女係咪想要辣椒?跟住攞左碟辣椒豉油埋嚟。今時今日咁嘅服務態度至啱架!

我問呢位女士有咩嘢好介紹?女士:「雞同麵吖!」心諗:雞有咩嘢特別呢?反正食完都要食粥,仲叫麵食?所以,冇打算試。

二. 扇貝(紅磨鏡):一份有六隻

三. 鮑魚:一隻$38

四. 賴尿蝦:一客約十隻,顧得食唔記得影相。相較起以上嘅海鮮,賴尿蝦係最鮮甜嘅---唔知係咪店員咁醒,知道先食淡味嘅嘢先呢?如果一開始食左賴尿蝦,咁其他嘢就淡而無味架啦!

五. 安格斯牛肉:約十八片,好好食!

六. 超甜粟米:八件,好甜!

 

七. 粥:用紅雞碗盛載

拿去上面蒸格,便見倒啲粥:樓面會幫係加入生菜絲

另外,還配有:油條、咸菜、芫茜蔥、炸菜隨個人喜愛而加入:

我淨係加左油條:

埋單係八百蚊,三個人食,唔算貴。

以食物而言,海鮮非常新鮮、樓面亦殷勤幫你蒸煮食物、但係我同姪女都係咁諗:貪得意啫!未食過即管試吓,但係我地都唔會再嚟,原因係:

食嘢食得太怱忙,好似食快餐咁----每碟食物蒸嘅時間唔同,所以要整碟放入蒸格蒸!蒸熟後又要即時分晒佢食---因為再蒸就過熟。佢唔似得打邊爐,可以鍾意灼咩嘢就咩嘢,好似碟牛肉咁,因為蒸嘅時間短,一蒸好便要即食---每人十片,真係食遲啲都過熟!

打邊爐係自己幫自己灼食物嘅,呢種蒸餾方法係店員幫係你放食物落去蒸嘅(不過要自己按鐘計時),蒸好店員便替你分;跟住又放第二樣食物落鍋.....所以,如果諗住「吹水」嘅千其唔好嚟

不過,前晚係閒日,如果係假期,會唔會要自己蒸呢?如果想試嘅,最好係有五個或十個人一齊食。十個人最好:蒸好一樣每人分得一兩粒/片,食完好食先再叫囉!不過,你點都唔可能由得佢響度蒸而唔放食物入去架!嘥柴火,人地都會俾面口你睇架!再者,好似聽聞最少都要叫三樣海鮮,否則啲粥唔夠鮮味喎!

以我咁唔鍾意食粥嘅人嚟講,果鍋粥都幾好味,好绵!但唔覺得係海鮮味,而係上湯味。因為我地食完鍋粥都未夠水份,店員加左啲上湯落去煮。

回應 (0)
我要發表
user