蒸發傳說

蒸發疑雲罩香江

議員亂噏當幫忙

官家老爺懵了面

全城大眾眼光光

近日紫荊城爆發失踪疑雲、一家禁書店嘅老闆李三皮、以及股東和店員等、一共五人忽然先後離奇失踪。令人驚訝嘅就係、正當江湖上盛傳大內密探越境執行蒸發命令之際、宮能代表五兩升毅然跑出來闢謠、並引述江湖傳聞指稱、五名失踪人士皆是非法潛人內地偷食家鄉雞而被拘捕的。之但係、好死唔死、內地一份半官方媒體發表評論文章指出、雖然大內密探不能先將有關人等抬上轎、然後大搖大擺通過關卡進入內地、但總有規避法律嘅手段、在不跨越制度底線之下讓有關人士配合調查。呢嗱、雖然規避法律嘅講法幾得人驚、但卻能撇除五人在內地偷食家鄉雞而被捕嘅謠言。雖然五兩升知衰公開認錯、但三皮嫂就企硬、唔肯接受佢嘅所謂道歉之嘛！

按照上述情況看來、李三皮等人若不是自己非法潛入內地、就是被人擄走的。之但係、若說他們是自己偷渡進入內地之後、再跑到衙門去自投羅網嘅話、委實太過不可思義、恐怕連三歲小孩都唔會相信。但假如係被人擄走嘅話、紫荊人嘅人身安全就毫無保障可言、這絕對是不能接受的。因此城督大老爺必須要承擔起所有責任、盡快與內地衙門交涉和查清原委、並盡一切努力尋得失踪人士嘅下落、以及採取一切措施防範再有同類事件發生。當事件水落石出時、便應該馬上將結果公布天下。呢嗱、咪話在下又靠嚇、呢劑嘢實在係十分濕滯、如果唔小心把錯脈嘅話、除時都會搞出個大頭佛來。莫講話會對來屆嘅議事堂選情構成災難性影響、恐怕連民心亦不能挽回、到時就真係喊都無謂架喇！知冇？！