天后：華姐清湯腩

呢輪每星期都要過天后兩次，所以今年嘅工展會我去左四次，因利成便、打破紀錄！

熟悉我嘅人都知我約人從來唔守時，祇會早到！尋日約會係十點半，呢種約會早又唔得、遲又唔得！所以我諗住過左天后才吃早餐，咁咪可以坐到夠鐘至應約囉。

我上午九時十五分去搭車，通常車程少過半小時；誰知足足等左廿幾分鐘才有車，車去到紅磡隧道口又塞一輪，結果食唔倒早餐！(回程仲慘：等左卅分鐘至有車！巴士公司路牌寫住5-10分一班車架！)

行經一間叫「華姐清湯腩」，醒起幾年前曾經有周刊推介過，於是約會後、大約十一時十五分便到此一試，食個早餐+午餐，盛惠$52。

雖然店內有其他食物，但係有心嚟試，梗係試佢嘅招牌菜啦！

清湯腩粗麵$40、腩汁蘿蔔$13。

食物一送到，見倒碟蘿蔔經已覺得唔對路：太稔！食味亦唔得！聲明係腩汁，但唔覺有。

至於牛腩，口感真係好複雜：一件「鞋」、一件「稔」、一件「靱」....

好彩個湯底都算唔錯！

不過，咁嘅質素，我屋企樓下隨便一間都好食過佢！

門外仍然貼上「蔡瀾」推介的周刊剪報，因已褪色，應是多年前的事。

正所謂創業難(我假設佢之前係好食嘅)，守業更難！現今牛腩麵檔開到成行成市，佢隔離便是「大利清湯腩」，我唔知佢點解仲可以生存？