天心更難測！

常言道：人心難測！不是嗎？以前細細個聽人地講(聽人講咋，講錯唔關我事架)：潮州人好惡死！成日打老婆、成日互毆，但係潮州人好團結，如果有人打自己兄弟，佢地會維護兄弟，對付外人！

引申出來：即係話，我地關埋門打生打死一件事，外人唔可以打我地！

再引申出來：我地打內戰一件事，外國打我國、就一定團結起來，一齊對付外侮！

呢樣嘢！中國人一向都係咁。當然，唔同年代都出左或多或少嘅「走狗」；佢地為左個人利益、又或者為左自身安全，可以置國家安危於不顧。好彩，一向以來，這種人始終佔少數！

但係回歸之後，不知何故？香港越來越多這種人(？)！現今太平盛勢，呢啲人咁做當然與自身安全無關啦；既然無關，咁惟一關事嘅咪係錢囉！

為左錢，可以自己人打自己人；為左錢，可以放棄人格、放棄「樽鹽」，我真係要salute俾佢地、甚至要向佢地三躹躬添----唔係咩？咁高難度嘅嘢、唔係你同我可以做得到嘅！

人心固然難測，依家至知：天心更難測！

早前有報導：下星期一好凍，氣溫跌至九度，香港有機會飄雪。

尋晚上海位姪女whatsapp我，告知上海氣溫是零下一度。

我問：「有冇落雪？」

姪女：「冇！但係勁凍。」

我：「有傳聞話香港下星期一氣溫會跌至九度同有飄雪喎！雖然天文台否認左。」

上海零下一度都冇雪落，九度又有咩嘢可能落雪呢？

不過，今早天文台又調節左預測：

天文台昨預測下周一氣溫最低只有攝氏七度，較前日預測的九度更低，新界及高地再低幾度，有機會出現結霜或結冰，要到下周後期天氣才逐步回升。雖然天文台亦否認本港下周日及下周一會落雪，不過，日本氣象協會預測本港下周一氣溫急降至零度，較天文台的預測還要再低七度。

同樣是預測，相距咁遠，信邊個好？

原本我地呢啲御用閒人，天氣冷熱問題都不大！但係下個星期一要北上呀，再下個星期一要出「騷」呀，冷親就大件事！不過，熱親都唔好過，焗傷風仲辛苦過冷傷風架！

如果平時，我都好恨見倒落雪架！記得我2003年又係咁上吓時間去北京旅行，那時剛好開始溶雪---天氣灰暗，感覺好差！所以到依家有人問起我，我都會答：我唔喜歡北京！因為第一印象唔好囉。

相反，那次我從北京轉機往南京。飛機降落時，我從高處望下，南京啲花盛開，天氣又好，所以我喜歡南京。

有一段時間，姪女告知想轉去北京工作。我答：「北京唔好，留在上海好！」

我喜歡上海繁盛，還記得當時我離隊自由行，每當問路時，當地居民好有禮貌協助我。都係果句：第一印象好緊要！

唉！依家點算？惟有望天打掛，希望今次香港天文台預測準確啲啦！

註：為潮州人平反！

早前聽電台節目，其中一位主持人表示佢最近跟團往潮州旅行。她發覺當地居民非常友善，反而香港團友表現似大媽！所以主持人認為香港某些人，應該放下成見：內地人初次來港，可能因為興奮，所以說話大聲左；與香港人往別處旅行一樣，祇是大家祇見倒其他人表現、卻沒有留意自己表現。