成功感！

我的粵曲導師曾對我講：「Van，如果你有咩嘢曲詞多出左嘅，俾份我參考，我要嚟做作曲題材。」

我份人樣樣事都好上心。半年前師伯因病唔可以再唱粵曲，於是將佢珍藏左好幾十年嘅曲詞俾晒我。我又執拾左一輪，每份曲留一份俾自己，送一份俾老師。

俾得老師嘅都係好舊好舊嘅曲(新曲佢點會冇吖)。舊曲通常冇「工尺譜」----以前啲伶人都係自己度啲腔嚟唱。

早兩個月，老師將一份我之前俾佢嘅曲譜上「工尺」，打好晒俾番一份我。心諗：佢俾得我梗係想我學唱啦！唔學好似好唔俾面佢喎！

於是咪約老師上課，學唱呢首曲囉！老師打算響「大棚課」時教呢首曲，不過原來有兩位佢嘅學生經已上「私鐘」學唱左。

結果，我用左四十五分鐘便唱完首曲。但係，我發覺有些位置唱唔倒；最終知道原來度「腔」嘅時候少左兩拍。

我問：「你又話有人執左私鐘嘅，佢地唱倒咩？」冇理由佢地唱倒、我唱唔倒架！

老師：「佢地冇你學得咁快！佢地未唱到呢度。」跟住咪一齊度吓，個腔應該點唱囉！度好之後，老師話會搵人打過佢再俾一份新嘅我。

上個月老師將打好嘅曲再俾我，佢話原來份曲其中一段欠了「上句」。粵曲有規格，有上句、必定要有下句才完整。佢叫我試吓幫佢作埋果兩句上句，佢話以我嘅水評應該可以做倒喎！

吓！咁抬舉我？作曲，非我所願也！又要押韻、又要顧住平仄、又要睇埋上文下理，又要譜埋「工尺譜」...唔容易架！不過，我份人唔衰得，咁咪硬住頭皮做左呢樣功課囉！

上星期交功課。哈哈！老師居然照單全收喎。我當時講：某一句個腔可以改個唱法(咁梗係即時示範啦)。老師認為我原本度個腔好啲。

老師：「Van，不如你試吓作成首歌吖！」

我：「吓！咁刺激？唔好囉，咁辛苦嘅嘢、留番你做啦！」

作曲？又要諗吓有咩嘢角色、人物要係自己喜歡嘅(一定唔會會陸遊、沈三伯囉)，又要諗吓情節，咁易咩？如果有朝一日我諗倒，試試又何妨！

自己攞苦嚟辛！