餅咭受歡迎程度大減

2016/01/23 08:14:52 網誌分類: 生活
23 Jan

中國人(梗係包括香港人啦!明明係黃皮膚嘅中國人都唔認係自己係中國人,呢啲咁另類嘅野,不在談論之列)結婚,響以前女家會分送中式禮餅給親朋。後來發展到以西餅咭代替,理由很簡單:

一. 中式禮餅當年冇餅咭。要送俾人便要續家續戶去,費時失事!

二. 西式餅咭有升值潛能。以前西餅咭冇期限:寫明一張咭可以領取一打西餅。咁樣即使西餅加價,持咭者一樣可以領取西餅一打,換言之,抵左!

三. 大批買有折扣。如果你八折買返嚟,原本四十蚊一打西餅咭,即係你用三十二蚊買倒;日後如果西餅一打係四十五蚊,一來一回你便賺左十三蚊。可以講係抵上加抵!

當然有機一樣有危:萬一發咭的餅店執笠,餅咭便變成廢紙!

即使如此,我那時都會買定十多二十張,間中請吓同事食餅「萬歲」。即使吾升值,最少都保值吖!

不過,依家餅咭越來越唔值錢啦!

首先,依家啲餅咭係有期限嘅;

第二,張餅咭寫住係值$50。如果西餅/麵包加左價,咁即係你有機會攞唔倒一打西餅!即係冇左升值能力啦!

第三,餅咭唔一定要攞西餅,你有權領取同等價值嘅麵包或蛋糕,但係我試過拎幾張餅咭去換斑蘭蛋糕,店員同我講:你俾現金會抵啲喎!結果我啲餅咭得物無所用!

最近舊同事結婚,我因事冇去飲,佢都寄左兩張餅咭俾我。早兩日拎張餅咭去攞兩條蛋卷、三個孖寶蛋糕(平日買係85折);計過條數,應該唔駛點補錢。可是,因為用餅咭,全部照正價---要補十蚊水!

咁仲要餅咭嚟做咩嘢?以後不如回封利事俾人好過啦---人地唔駛一定要換西餅吖馬!

回應 (1)
我要發表
2016/01/23 14:55:06 回覆

餅卡換生日蛋糕唔抵!我以前儲埋幾張可換生日蛋糕,而家用卡買有折,用餅卡無折!

user