權利與義務

現代香港人最大嘅問題，係祇知要權利，卻不知要負公民責任、義務！

剛過去嘅星期日，係香港自1957年以來最凍嘅一日，加上有雨，當然凍上加凍！

於是，有人(怪獸家長+教協)施壓要教育局停課，驚冷親子女！

近呢幾十年，每遇天文台掛八號至十號風球，便有人一家大小去海灘觀浪、甚至滑浪！可能在我年輕時，要去海灘都唔容易，可能要轉幾轉車才到(嘩！錢從那裡來？你估我好似依家啲小朋友咁，遠少少都可以「打的」咩？)；而且，風球高掛亦冇公共交通可乘！即使有交通工具，但那時係人都知道咩嘢叫做危險，唔會做呢啲咁愚蠢嘅動作。

打風到海灘觀浪、滑浪，可以逞一時之快；不過，大家有睇報聞嘅都知，很多時都會發生意外；如果死果個係當事人都好(人地喜歡玩命，咪成全佢囉)，最慘偏偏係該死果個唔死，累死左救佢地嘅警察、消防員、甚至係無辜好市民！

據知上星期日當警方獲悉很多人被困大帽山，便一方面救人、一方面封鎖上山路徑，避免更多人發生意外。但一名「黃屍港女」在警察封鎖上山路徑後，依然堅持上山，還與警員對峙(佢仲唔知醜玩自拍添)，其中有一句係：「條命係我嘅！」咁係咪即係佢真係有事，都唔關人事呢？

可能知道後果，即時補充：「但救人係你地責任！」

即係：我喜歡點都得，但係我有事、你地有責任救我！

如果我係政府，就立即修改法例：遇倒呢類情況，好似公營醫院咁做分流---這類自殺式行為屬非緊急性，在救晒其他有需要人士後才處理(它們)；一切開支俾張賬單佢收數(非緊急情況用救護車都要收費啦)，如有公職人員因拯救佢地而發生意外，一切後果佢地負責(控告佢地誤殺或者誤傷囉)…..不過，咁樣改例會通過咩？一日有「犯人」響「垃圾會」度，香港施政真係舉步艱難！否則，呢個「港女」點咁聲大夾惡？

又或者退而求其次吖！響咁嘅情況下，有人堅持要送死嘅，叫佢地簽下生死狀，有事都與人無尤，唔駛救！

同樣情況，海灘掛左紅旗，仍然不顧危險要去觀浪、滑浪嘅，遇事亦唔救------佢地唔係小朋友啦！大人大姊，自己決定嘅嘢、咪自己負番責任囉！

那邊廂有家長/教協認為天氣寒冷，學校應停課；想當年(愿諒吓啦！一個人年紀大左就會咁架啦)，我仲係讀小學；當時學校在筲箕灣(我應該冇寫錯字掛？我又唔係港大學生)東大街，每天返學都要經過漁市場，那裡是低窪地，每逢大雨便水浸至我膝蓋，記憶中學校從未因水浸而停課，我那時幾歲大咪一樣要涉水返學！所以，我果個年代嘅人，一般都比較捱得----工作幾十年，我極少會因病請假(雖然打政府工，有的是假期)，很多時醫生俾左病假、我一樣返工：失聲？我仲可以寫字，何解唔返工？加上我後期果份工，十號風球、黑雨/紅雨都有機會要當值，我唔會學某些同事咁唔接聽電話，接唔倒「柯打」咪唔駛返工囉！可能你地會覺得我蠢，但係事實證明：肯捱、抵諗係絕對有回報嘅！

那些年，家長會教子女：打風唔好出街、天涼如何加衣保護自己(那時冇暖爐、亦冇暖包，小朋友將可以保暖嘅衣物穿上身，攪到成隻「糭」咁)、上課要自己學穿校服、每天做完功課、睡前要自己執拾書包，準備第二天上課物品……..現在如何？

打風時，家長會帶子女去沙灘觀浪/滑浪；氣溫下降叫學校停課；穿校服/收拾書包呢類嘢都係家長或者「姊姊」做…..難怪有校長指出：現今的學生連鞋帶都唔識挷！

唔識挷鞋帶事少，唔識做人才事大！試諗吓：家長可以照顧子女一世咩？係都唔好咁望啦(即係子女先你而死)！既然唔可以一世照顧佢，係咪響自己有生之年訓練佢地呢？過份保護祇會誤佢地一世！最慘呢個係現今社會普遇現象。

依家社會繁榮，普遍家庭生活較從前豐裕；這點當然可喜，但是人亦越來越鍚身----既唔捱得、亦唔話得！祇知有權利、不懂有義務。