《寧願等多一班車》

有人說「曖昧」是兩個未進入戀人關係的朋友，最好玩的階段，因為大家都捉摸唔到，望唔透，感覺接近，又有段距離，互相測試，感覺神秘又心動！

對方每一個小動作或說話，隱約好像給你一些暗示，令你十分期待，有時又會無乜話題，但大家都好鍾意一起時的感覺，這種患得患失的經驗，相信大家都經歷過？

「我今日玩得好開心呀…多謝你陪我…」

「哈哈，我都係呀…」

兩個就係咁企左係條街到，有種難捨難離既感覺，如果是第一次見面，呢種將要分開離別的感覺就更加強烈。

「不如…我陪你等車呀…」

男方終於鼓起勇氣，踏出第一步，而Tracy亦點頭，一個微笑表示接受好意，畢竟兩個都是第一次約會，對方一言一語，每一個行為都衝擊著身體所有的感官。

街上人多車多，巴士站排著長長人龍，兩個嘗試不斷去搵新話題。

「係呢，你等陣搭咩車走呀？」

Tracy望住阿賢，而男仔有少少面紅，刻意迴避佢眼神。

「呃…好似對面有巴士…118」

「118？我屋企樓下好似都有站喎～」

「係？但你唔係住南昌咩？」

「係呀，但架巴士會向旺角方向行嘛～」

阿賢對於平時自己搭開既巴士行既路線，多少總會有點印象。

「但係..好似唔經南昌..好似係行長沙灣個邊呀？」

Tracy 係一個典型既路痴，有時腦海內只有一個大概的印象，其實並唔知道太多交通路線。

「好似南昌附近係有個站…幾近長沙灣~」

如是者，巴士行經路線，就成為左兩個之間既話題，當你喜歡對方，就算話題幾無聊，咩都可以傾一餐。

「既然係咁，試下都無妨，巴士有時都會改道，我同你一齊上車，順便送埋你返屋企，先再搭車走啦。不過如果你記錯，就要送我返屋企啦~」

「吓！唔制~」

未久，巴士已經埋站。

阿賢本身住港島，明明附近有車可以返屋企，但心裡面想同Tracy相處多一陣，所以就找藉口，故意陪女仔一齊上車。

只係幾個站既時間，Tracy好快到站下車，但阿賢發覺身處的南昌，118巴士係唔經呢到，一落車阿賢已經知道「奶左野」，周圍既環境都唔同。

「Tracy..呢到好似…我印象中好似架118車唔經呢邊…」

「係咩..無理由喎..我明明記得有個站就係附近…」

Tracy指著前面一個車站，阿賢仍然覺得唔對路，但避免Tracy唔開心，無謂爭辯，因為覺得對錯都唔重要。

處於曖昧階段的兩人，都好著緊對方的感受，如果換轉是平日個朋友，被人老點左，一定所有粗口都出哂黎！

兩個人最後就好似遊客咁，逐個逐個巴士站牌去睇。

「真係無喎..」

「前面條街仲有站.」

呢個時候，佢地同時發現其中一個巴士站，上面寫住18..

「哈哈..點解會少左個1字既」

Tracy用一個笑容，去逃避呢個事實，而阿賢也報以一個微笑，接著一齊大笑。

「你死啦，你要送我返屋企啦。」

「吓…唔好啦…放心…我會幫你搵到118個站先..」

「講笑姐，放心啦，我會搵到既！不過我要睇下自己衣家係邊度先！」

阿賢就攞左個電話，用google map搜尋自己的位置。

「我知啦，我行番出去長沙灣個邊，就有118巴士啦！」

「咁我陪你行過去啦。」

「唔洗啦，都到左你樓下，不如..我送埋你返去先啦。」

「唔洗啦..我陪你等左車先啦。」

兩個人就係咁係條街推推讓讓，其實大家都唔捨得對方，最後變左好似情侶一樣散步，兩個傻下傻下咁吹風，慢慢的行去長沙灣，而這段十幾分鐘的路程，成為兩個人的世界，雖然雙方都無乜講野，但心裡想的是希望這段路可以再長D。

初戀之所以咁難忘、咁深刻，就因為大家都會在不知不覺之間，為對方做左一D好傻既事，你的一笑一動都彷彿牽動著我，離別之時，依依不捨，只想陪你多一陣。