「腦」回家

用左六、七年部電腦，早兩日我批准佢榮休；結果....咪財散人安樂...買過一部咯！

其實呢部電腦都維修左好幾次，「哎呀大仔」與豬朋都建議我買部手提電腦用；豬朋更拎左部舊嘅手提電腦給我作後備，萬一我部腦真係壽終正寢，都有部遲鈍嘅項住一陣吖！

不過，要走嘅、始終都要走，留番佢祇係久延殘喘，我處事唔似得政府咁，手軟腳軟；過左年，趁住大部份約會都集中左響下一個星期，呢個星期較清閒，於是早兩日咪搵人同我裝過部囉！

我考慮左好耐：手提抑或座檯？最後都係寧願買番部座檯。與錢銀無關，據我所知價錢差不多！祇不過手提電腦嘅鍵盤我真係用唔慣，成日會打錯字。

我響電腦鋪見倒個迷你鍵盤幾得意，店主告知：如果唔係因為地方太細放唔落，千其唔好買呢種鍵盤，好唔方便！「哎呀大仔」用九方寫中文字，佢唔識打字，所以用鍵盤祇係「一指神功」，所以冇影響；我地以前打寫字樓工，便一定要學識打字，其後開始用電腦，便學「倉頡」及「速成」輸入法，要兩隻手並用，所以我用唔慣迷你鍵盤！

今日終於拎部新電腦返屋企咯，希望佢聽聽話話，好駛好用，健健康康啦！咁嘅要求唔算高吖！香港人大部份都係祈求安居樂業啫，呢個係基本要求，偏偏有啲人唯恐天下不亂，冇果樣整果樣，撹亂香港，奈何！