[灣仔] 熟食中心的長龍車仔麵 - 九記牛什粉麵 (灣仔)

之前跟朋友提過灣仔鵝頸街市熟食中心有一檔午市長期排長龍的車仔麵，一直都想試一下，前幾天剛好他在灣仔這邊見客，兩人的試食兵團遂匆匆成行。

去到熟食中心，離遠已見到一條長長為數廿多人的人龍，全部都是排隊買車仔麵的，難得來到當然照排啦。

等了差不多十五分鐘，終於輪到我們，事先已做了research，知道這裡的炸魚餅很出名，當然唔執輸要番一份，加埋牛腸同牛筋腩，配個幼撈麵。

而朋友亦要了炸魚餅，牛筋腩及豬紅配湯幼麵。

首先當然要試下那個馳名的炸魚餅，這裡的魚餅因太受歡迎，貨如輪轉。排隊期間見廚房不停端出剛炸起的魚餅，夠哂新鮮，雖不是即叫即炸亦不遠矣。

魚餅咬落外脆內軟，不是手打彈牙那種口感，卻食得出是自家製貨色，微脆軟糯的口感加上調味得宜，難怪大受歡迎了。

除了魚餅，這店的牛雜亦做得頗特色，不是外面炆得上哂色的那種，牛腸上碟仍是象牙色的，看似淡而乏味，但食落卻甘香入味，邪惡食品永遠都是這麼美味。

其他的配餸亦具水準，牛筋腩炆得惹味軟淋，豬紅亦煮得入味，不會一夾就散。

一向對車仔麵的湯底不會太有要求，而這裡的卻有點驚喜，雖不是甚麼貴價湯底，但起碼飲落味道夠清，不似一般的味精湯濃膩封喉，配埋幼麵吸收湯底味道，清甜味美。

另外撈麵的醬汁偏甜，略為乾身，配埋牛腩汁及少少炸金蒜，都幾惹味。

每碗三餸麵盛惠$27，算是超值。説實在，在熟食中心食飯，環境真的欠奉，但出奇地這裡的顧客竟不乏斯文的OL，或西裝筆挺的辦公室一族，可想而知食物質素與價錢的吸引，而我們亦都打算擇日再encore。

原文連結: [灣仔] 熟食中心的長龍車仔麵
更多資訊，盡在: 古家私房菜
Facebook: https://www.facebook.com/myplayground2015 

古家私房菜
本肥仔廚藝不算精湛，勝在有三心兩意－－用心、耐心、貼心、創意同心意，見到朋友食得開心嘅同時，我亦覺高興！