登高望遠

2016/03/08 13:52:17 網誌分類: 生活
08 Mar

中學同學每月聚會,基本上都係竹戰加食晚飯;難得尋日約去行山(係正常聚會以外的約會),通常參與者都係小貓三兩隻。

上星期我一直盤算緊去唔去?因為由我家至集合地點(寶琳地鐵站)頗遠,我又未去過,有點人生路不熟的感覺;於是whatsapp問召集人V(同學之中佢跟我特別老友)點去?佢知我都去,有點喜出望外!便叫我乘297巴士,出左隧道第二個站下車,佢響果度接我,與我先吃早餐。

其後去到寶琳地鐵站等人,其他書友仔見倒我都好意外:「你唔係怕行嘅咩?」

我:「呢啲係謠傳!我唔係怕行、係怕晒。我以前份工經常要行山、行村,動輒行幾小時,我點會怕行?不過,我好怕晒,因為一晒便甩皮,皮膚晒黑左半年都白唔番。」當年打工冇法子,依家要晒嘅,可免則免!

尋日好在天陰陰、灰暗暗,中途仲落雨添!不過,對我來說,總好過出太陽囉!

我地做晒事前準備架,先拉吓筋:

書友仔見我拍照,有點驚!我:「唔駛驚,你地淨係有資格做「影後」啫!我唔會俾你地正面視人。正所謂:己所不欲、勿施於人!我地仇家多,加上又係女兒家,唔可以咁隨便俾人見架。」

之前有書友仔問:「條路難唔難行?」

V答:「行幾十級路,之後便......難唔難?因人而異喎!」

結果係幾十級之後、又幾十級、又再幾十級....行左幾百級先落山。我不禁要引用唐英年果句:「你呃人!」

小學門內,有不少花卉:

行經邵氏片場,可惜冇嘢睇!

行到接近科技大學,路旁種了不少茶花:

一入科技大學,便見到大條橫額,心諗:「時運咁低?咁遠水路行到呢度,居然遇著「本土」?唉!呢班嘢攪到人心惶惶。好彩睇真啲,原來係「土木」,但係連字體都一樣,問你死未?

我地十時十五分開始行,十二時十五分到科大,一於醫肚先。茶樓寫明係供職員用,不過問問又何妨?侍應告知一時離開便可,如果唔得就要去飯堂食。茶樓招呼唔錯,不過食物質素就真係好一般囉!勝在便宜。我地食到兩點都冇人趕我地走,反正有好多「吉檯」!

一場入到嚟,點都到處行吓:

行到三點三,去飯堂飲下午茶---真便宜:書友仔叫個普通咖啡加蛋撻,算係下午茶餐九蚊;我叫個凍莫加咖啡加蛋撻都祇係十九蚊.....質素?咁嘅價錢,食得過啦!

T完搭專線小巴出坑口,又咁好彩一去到便各自可以跳上自己要乘嘅巴士,打道回府,作鳥獸散!

其實呢條路一點不難行。

回應 (0)
我要發表
user