朗廷酒店「唐閣」

去年十二月響網誌介紹過「唐閣」的午餐。其實我都食過佢嘅晚餐，祇不過食午餐較多。午餐平均每位四百至八百，晚餐一般比午餐貴，每位點都要過千！

雖然我平日好慳儉，有時間一定自己煮食；冇時間煮都祇係出街食個下午茶當晚餐，慳埋慳埋，一次過豪食當獎勵自己囉！你估我會唔會吖？更係唔會。不過，律師同總監經常請我地幾姊姊食好嘢，上星期律師請我地響「唐閣」午餐，我地當日就約定響尋日請佢兩位食晚飯當回禮---食幾餐、回一餐，當係獲利回吐囉！做人係咁架啦：你氹吓我、我氹吓你，咁先至開心架馬！律師知我鍾意飲奶茶，今次響英國帶左罐紅茶葉俾我，佢話沖出嚟又濃又滑喎：

不過，尋晚真係波折重重！我手機果個日曆、不知何解？經常提醒我過左去嘅約會。尋日午後佢一直彈左「唐閣」約會出嚟，我心諗：咪食左囉！跟住仲煮埋飯，五點半如常食埋飯添！七點鐘收倒律師whatsapp，告知我佢在尖沙咀塞緊車，叫我地食住先。 才突然醒覺：死啦！我地尋晚約左律師同總監食飯，羅漢請觀音---請人地唔可以失約架！果陣經已係七點零五分，過左約會時間。

嘩！立刻冇鞋挽屐走，連眼耳口鼻都唔得閒執番，穿上衣服便走！平日去朗廷酒店我會搭專線小巴到太陽廣場下車，行一條街便到。尋晚既然遲左，梗係「打的」啦！好不容易跳左上架的士，告知司機大佬我要去朗廷酒店；司機大佬話朗廷發生交通意外，幾條主要通道都癱瘓左。因此，佢才走嚟紅磡，誰知都係難逃一劫！

我問行柯士甸道轉入廣東道有冇問題，佢答唔知，但係如果經漆咸道轉金域假日酒店就一定冇問題！咁都要架：結果咪響假日酒店落車行九條街去朗廷酒店囉！

哈哈！好彩六個人，我都唔係最遲果個---七點十分才出門，七點三十分到步，係咪好叻呀？不過，今次真係老貓燒鬚---從未試過忘記約會！因為我地從未試過見得咁密，祇因律師月尾返英國，所以今次咁快又「飯聚」！最衰咁啱又係響「唐閣」，才會發生這個不美麗的誤會！

佢地一早點左個餐：(照片所見，除片皮雞外，全是一人份量)經驗之談：叫套餐一定抵食過散叫。

一. 醉翁蝦連湯(內有圓肉、杞子)

二. 蟹肉燕窩羹：燕窩同蟹肉都頗多！

三. 片皮雞：與片皮鴨風味又不同

每人有兩至三片：

四. 蒸東星斑

五. 鮑汁燴鮑魚、鮮冬菇、遼參：汁唔錯！遼參可以再稔一點。

六. XO醬爆雞(用了片皮雞剩下的肉)：好惹`味！

七. 魚湯花膠麵：因為上面果味太濃味，相對呢個麵湯底太淡！

八. 甜品生果拼盆

「唐閣」出品，唔會差得去邊。埋單八五折後係六千二百(我地個個都有朗廷酒店貴賓咭)----一千蚊食倒鮑、參、肚同燕窩，算好抵架啦！

諗番轉頭，原來我個胃好有彈性----食個下午茶餐當晚飯又得、尋晚五點半食完晚飯、七點半再食多次都仲得！