嘩!真係估佢唔倒

2016/03/28 06:34:22 網誌分類: 生活
28 Mar

上星期又下雨,又潮濕,搞到個人好吾舒服。呢兩日陽光普照,有咩野好得過行街濕平,晒下條命吖!

剛過左去嘅星期六,舊公司(不是政府)的同事約了來我家茶聚、飯聚。原本諗住最少都有「九男女」(呢個數字係我嘅宿命),哈哈!誰知結果得番四個人;因為有同事要帶交流團上北京、有同事又要帶學習團去潮州,有人趁有幾日假期去旅行...結果:我叫大家就吓老板位司機M哥,因為老板去左旅行,M哥星期六可以一齊聚聚,平日老板在港,佢身不由己,好難約。星期六有一位舊同事剛去完韓國旅行,要晚飯至嚟倒。

其實每位同事最近都有去旅行,去韓國咪買人參糖、去芬蘭買朱古力、菲律賓買餅.....所以我都收倒好多手信。不過,最好食係韓國買回來的「柿乾」:真係好好食(又話抵制韓國貨五年嘅?戒買唔戒食)!食落覺得係好原味,冇添加。係M哥之前去韓國買左覺得好食,叫另一位同事去韓國時代買嘅:

M哥與另一位同事都有俾人參糖我,兩隻牌子唔同,但都係唔好食:

雖然有同事因為要去北京唔嚟得,不過佢有俾相我睇:

點解人地去北京就花似錦,我去北京果陣---天色灰灰暗暗、溶緊雪,攪到我對北京全無好感!

四個人飲完早茶,除左竹戰之外,有咩嘢好做吖!原本M哥響群組度講左唔打麻雀,因為流年不利,打親都輸咁話。後來我同佢講電話,我話:「我夠打親都輸咯,咪一樣打!唔係我唔怕輸,祇不過又唔係成日打,所以輸左我當係應酬費!如果打親都贏,搵鬼同你打呀!」結果.....M哥咪就範咯....我話:「豈碼有我墊屍底吖!」

不過,有陣時啲嘢真係....今次兩男對兩女,結果係兩女贏兩男---我竟然係贏家!贏左四百幾,另一位贏左七百幾!我冇著數架,佢地慣左有大食大(年紀呀)-----飲茶加晚飯食左我兩千大圓呀!不過.....又當係應酬費咯。

晚飯去我附近間「寶哥火鍋」。我通常都唔點食物,咪叫另一位羸家點餸囉!結果出事啦......

呢位女同事未入公司之前是模特兒,當然係有樣兼窈窕啦!不過,佢一向揀飲擇食(不過食量驚人);唔好以為佢揀果啲食唔肥人嘅嘢食喎!佢同我位「哎呀大仔」嘅挑剔法有過之而無不及,而且更加不可思議----專叫煎炸嘢、食豬肉但唔食啄碎左嘅(雖然都係豬肉,所以叉燒包、燒賣果類都唔食)、牛肉又唔食.....

我地顧住傾計,都未知出事,到食物嚟齊,份量顧之然係太多;你估佢仲叫左啲咩嘢?嘩,好驚呀:

雖然基本上我咩嘢都食。雞子我都食(不過咁大粒嘅雞子,我都係第—次見)!但係一粒起、兩粒止囉!而且,呢個樣真係好點恐怖!佢仲叫左:

豬肺、豬肝、豬腰.....即係所有豬嘅內臟都叫晒。但係現代人,好多都唔會食內臟!我雖然都食,但唔會一次過叫咁多嚟食。我好俾面架啦...每樣都有食,不過其他人就講明唔會食囉!

不過,你又真係估佢唔倒(雖然我知佢好食得!呢個世界就係咁唔公平架啦:我識呼吸都會肥,人地咁食法、就食極都唔肥),佢居然一個人食晒呢幾碟嘢,仲有食其他嘢......響鈴、羊肉、魚餃、蝦滑、雜菜、菇菌、烏冬、醬爆丸、......

難道食呢啲嘢可以keep fit?

打邊爐熱氣,所以我甚少選擇。不過,好處係就啲口味奇特嘅人囉!

食完第日即刻煲個「青紅蘿蔔南北杏湯」飲潤吓,仲加埋黑龍江黑木耳---要降吓膽固醇啦,食咁多內臟!

回應 (3)
我要發表
VanYYY
VanYYY 2016/03/30 09:19:32 回覆

我食雞子,但係呢個樣真係恐怖!

開心van仔
開心van仔 2016/03/30 00:47:21 回覆

雞子唔敢食!太恐怖!

sinnid
sinnid 2016/03/29 12:57:58 回覆

好多好野食...流哂口水...

user

最新回應

立 冬
立 冬 2018/06/13

新版都有好處的, 至少用手機來睇會較以前方便.  你休息夠了再回來啦!   {#iconb_21}

VanYYY
VanYYY 2018/05/24
@域 流亦詩...

雖然我封舉,有空仍會拜讀你的大作!

KING.
KING. 2018/05/19

都要改啦, 以前頭條blog都唔係mobile reponsive web. 而家改左,你有冇發覺冇以前咁棘.

域 流亦詩
域 流亦詩 2018/05/18

祝你身體健康、愉快。它朝有機會再在博海相見!