機管局fb籲「瘋狂鬼馬」留言引爆關公 林超英食花生
機管局強推造價逾1,410億元、或只可降落用的機場第三條跑道工程「上馬」,並計劃向離境旅客徵收機場建設費融資,惟空域等關鍵問題仍未解決。機管局近日在facebook專頁宣傳「你想機場設計比賽」,邀請網民發揮「天馬行空的創意」、「瘋狂鬼馬主意」提交建議,惟網民紛紛留言嘲諷,除要求撤回三跑工程外,更有人建議設游泳池及溫室種有機菜,暗寸特首梁振英夫婦早前發表的言論,引發公關災難;一直反對建三跑的天文台前台長林超英亦在其facebook專頁分享此帖文,並留言讚賞網民:「告訴機管局你想點,留言很好看」。
機管局在facebook專頁宣傳比賽時,率先提議「飛機改裝的膠囊旅館、應有盡有的健身室、遊樂場甚至是動物農莊?」讓網民思考,但網民不領情,其中Dennis Yung更留言反駁當局應「改善吓行李帶,登機橋,其他咩健身室請收皮」,又暗寸「搭得飛機都係趕時間,仲得閒同你去玩gym?不要巧立名目做啲貪污工程!起埋卡拉OK同桑拿啊笨?」
Dennis Yung繼而申述反三跑理據,「二號客運大樓,起完又拆想點啫,錢多?起三跑前請先解決空域!否則只會淪為貪污同大陸的軍用機場!
仲有,九七前港英政府成個東涌同新機場的玫瑰園計劃使費才千五億,啲料仲要外國入口;你今日起條三跑就要千六億,啲料仲要大陸垃圾質素……唔好當香港人白癡!千六億喺全球任何一個城市,足以起一個最先進的機場,而不是一條跑道!問香港人想點?我哋要的機場係有實際用途,而不是用來畀你班奸商抽水用!」尖銳的文筆,獲逾千網民讚好,讚好數目更多於原帖僅百餘個。
【網民「瘋狂鬼馬」留言】
Siu Kam Ting:起游泳池啦,等職員食飽飯可以游20分鐘水。再唔係起番個溫室,畀唔同國籍嘅人等待上機嘅時候,可以試吓種有機菜。
Eva Ng:當然要有解放軍駐守、起個酒池肉林骨場,等我國佳麗一展好客之道,令外國旅客賓至如歸。起番個紀念中華海豚展館,記得上香!起個用鉛水種有機蔬果菜場,歡迎外國遊客及眾高官免費試食及購買。
Kenneth Lam:起多個運動場館,場外一定要禁止做運動,而場館個期永遠畀人book哂去開校務會議,既遠離校園又夠偏僻,啱哂校委會主席心意。
Alex Poon:起個墳場啦,骨灰龕位都得架。咁起碼我哋啲香港人死晒都有個靚景睇吓呀嘛!
Sheron Kwok:最好就梗係有視聽室,全日不停播放AV啦,一個唔覺意仲可以推力本土經濟,創造就業機會;再唔係就整個太空倉,無重狀態嗰隻呢,香港啲膠官個個都離晒地,完全睇唔到、聽唔見市民嘅需要同訴求,唔係佢哋嘅錯,係我哋太down to earth啫,等各位市民一齊都咁堅離地,到時可能無咁多怨氣。
Mia Ray:為了增加外國人對香港未來人才之認識,建議擺份TSA卷,日常家課册……等外國遊客知道,原來香港8歲大的小朋友,可以一分鐘計一條數,都面不改容。及用兩小時可以完成12樣功課之摩打手。證明香港未來還是有競爭力的。