梅菜蒸豬肉

呢味餸係我地兒時食物。以前生病要戒口、上課或返工要帶飯盒，「梅菜蒸豬肉」是主要餸菜，間中都會有咸雞食！

講真吖！大個左屋企都未試過整呢味餸，反而成日都食雞；可能生活環境好左掛。不過，依家啲豬肉、牛肉都好貴.....應該係話：依家啲餸菜都好貴！

上星期響上海南貨店買「糟滷」，順便買埋梅菜。店鋪有三種梅菜：一種咸梅菜、兩種甜梅菜。咸果種我唔會買，因為即使係甜梅菜，其實都好咸；所以買回家要先處理好放雪柜，要用時才續少拎嚟用(處理方法在以前網誌介紹過)。

甜梅菜一種係$16一斤，有莖有葉、另一種$32一斤，祇有莖冇葉。老板娘指貴果隻唔駛浸，可以即食。我問：「係咪真架？」老板娘：「你買嚟試吓吖！」價錢貴一倍喎！不過都試吓啦，最多都係笨一次啫；呢檔買慣買熟，呃我嘅以後冇交易！

結果買左幾棵。沖洗後試少少，真係唔咸喎！於是跟正常程序處理：浸洗、切碎、乾烘、下少許糖(呢隻唔落都得)、麻油炒勻攤凍放雪柜。

一般我會用嚟煮「梅菜蒸鯇魚腩」。尋日忽發奇想，何不試吓「梅菜蒸豬肉」？我用左火鍋用嘅豬肉片。我家雪柜常備，貪佢份量少(每包180克)，結果效果好好喎！

材料：

火鍋用豬肉片180克

已處理梅菜(份量視個人喜好)

一. 豬肉片溶雪後略沖洗，分開一片片，大片可以一分為二。

二. 用少許水，加蠔油、生抽、糖、粟粉、麻油拌勻，倒進肉片內醃半小時。

三. 豬肉片上碟，加入梅菜拌勻，蒸七分鐘。睇見都知好juicy啦！

註：

一. 火鍋肉片薄，所以先將醃料拌勻才加入，避免將肉片整碎。

二. 尋日食完早餐行去附近間大昌行入貨，咁啱火鍋肉片做緊88折，一包$14.90(原價$16.90)。計埋呢碟餸唔駛廿蚊，平過茶餐廳！