固腰湯

有番咁上下年紀嘅人，我估最少有一半都有骨痛問題。除左因為年紀大、機器壞之外，其實好多時係因為年輕時跌傷左冇認真處理，老來便周身病痛！又好難講嘅，未退休要返工，祇要行得走得，即使錢唔係問題，邊可能花咁多時間做物理治療吖！做過物理治療嘅都知好花時間架。

我呢兩年一直有腰痛問題，除了舊患，還有新傷！西醫、物理治療、中醫、針灸...真係講得出嘅治療方法都用試過；雖然唔係經常痛，但自知並未痊癒。

早幾個月經書友仔介紹我睇一位鐵打師父。據書友仔講：佢親戚唔行得都醫好左，佢自己半年前腰痛要用枵杖，最後亦醫好左。佢叫我試一兩次，覺得好嘅咪俾佢醫囉！唉，我呢啲陳年舊患，除左神仙，有咩嘢可能睇一兩次可以醫番好吖！結果，我好有恆心架，每星期都去做一次治療(最初果陣每星期兩次)，係有好轉嘅，不過尚未完全好得番。

除左治療之外，我一向都相信藥療嘅。呢排天氣潮濕，於是煲個「固腰湯」飲吓，有益之餘，亦唔難飲---雖然煲完個樣黑麻麻，但係一點不苦，祇係甘甘地，驚嘅咪落多啲肉囉！

我買左「余仁生」湯包(雖然較貴，不過信得過吖馬。功效：固腰補腎，通絡利濕)，根據包裝指示加左一大舊豬尾骨，私下又加左幾粒黃瑪卡(係肥媽最先響佢節目度介紹過嘅)：

註：

瑪卡(Maca)，又稱為秘魯人蔘，是秘魯安地斯山脈上高冷十字花科植物，為近年來國際上矚目的天然保健食品。瑪卡為純天然的藥用植物，具有多種對人體有益的重要生理活性成分，近年來，學者們逐漸證實瑪卡植物在調整內分泌系統、提高抗氧化能力與抗疲勞之功效、提高生育力、改善性功能、治療更年期綜合症、舒緩焦慮、增強記憶力及注意力等作用上有所成效。瑪卡植物已先後被美國太空總署、國際登山組織聯盟、2002 韓日世界盃等單位作為指定保健產品。