紅磡「逸」酒店自助晚餐

2016/04/03 11:58:31 網誌分類: 講飲講食
03 Apr

姪女響三月卅一日零辰到港,第二日係愚人節。姪女叫我諗吓夜晚食咩?幫我慶祝愚人節兼補祝我生日。我生日已過,姪女果陣發覺旅遊證件有問題,返唔倒嚟。

佢當日下午約左人午飯。臨行前叫我諗吓有咩嘢好食。我咪上「開飯網」摷吓紅磡附近有咩嘢食肆我地未試過嘅囉!最終搵左三間,其中一間便是這酒店剛推出的「黑鑽松露和牛盛宴自助晚餐」,依家做緊七折。

特別指出:唔好誤會係「海逸酒店」,係「逸.酒店SAV」,位於紅磡蕪湖剩,被舊樓包圍住;我大哥同姪女去年回港,曾在該酒店住了幾日,貪住近我囉!

上「開飯網」,見佢寫住消費是$201-400。我諗住以最貴嘅價錢計,四百蚊七折,即係三百多少少啫;但姪女訂座時才獲告知是$538,加一服務費後再七折。不過,都冇咩嘢所謂啦,又唔係我俾錢!哈哈,哈哈,呵呵呵.....其實我覺得好貴架----以佢附近嘅環境...

不過,上到去又好OK喎----侍應招呼好貼心(我未試過有酒店會特別拎個竹籃俾你放手袋,擺在檯底,係咪安全啲呢?)、食物亦擺放得齊整..

姪女好杯中物!自助餐包咖啡及茶。但加$128便汽水、啤酒、白酒、紅酒任飲。姪女問我叫一杯($75)好,還是要這個任飲好?(佢有選擇困難症)我答:「我唔好飲酒,而且飲飽水咪食少左嘢,我唔飲!你叫好一杯酒自己飲啦。」

佢計過條數---飲兩杯便有賺!當時佢諗住食海鮮飲白酒、食牛肉飲紅酒,咁就值回票價啦!結果----兩杯白酒都飲唔倒!唔係佢酒量淺,係太多嘢想食。證明我係啱嘅。

食物不斷加添!因為客唔係咁多,所以傾計唔會嘈;而且啲客都係以年輕人、外國人多,都比較斯文!即使有小朋友,都唔會通處走,嘈住晒--呢啲係家教好!

有提供「滴漏咖啡」,不過要另費:

龍蝦好食!好有誠意,隻隻都充滿蟹籽---去年四月響尖東果間East Cafe,我查翻記錄,價錢一樣,但係質素相差好遠!

翡翠螺好大隻!姪女都覺得好食---出面咁嘅質素賣十幾蚊一隻,食多幾隻才歸本。

雪耳木瓜煲雞:姪女飲左兩碗,我飲左一碗---梗係要留肚食吓其他嘢啦! 

西班牙火腿、凍肉:

誠意推介:48個月西班牙火腿----一般酒店頂多都係去到36個月,姪女話未見過俾48個月嘅火腿(火腿越耐越香,亦冇咁咸),好貴架,食十多片都成百蚊!

因為火腿偏咸,一般會包住蜜瓜食!咁就要行去生果盆果個度自己拎蜜瓜啦。不過48個月果啲唔咸,就咁食都得!

生蠔睇落好似好瘦,但係原來好鮮!我本身唔係咁鍾意食生蠔,但係此店生蠔好食。因為人客不多,侍應每次祇開十多隻,食完再開,包保新鮮。

溫泉蛋、日式冷麵:

魚生少不了:

龍蝦、蝦、長蟹腳:(呢度啲蟹腳真係有蟹味)

翡翠螺、龍蝦鉗:

主角出場:M5和牛漢堡

燒菠蘿、串燒:

牛肉黑松露炒飯:

羊架:唔好食---太霉!

 黑松露醬汁魚:

蒜片M5和牛粒、牛筋腩(好稔):

黑松露小籠包、黑松露....

酒店標榜全用有機蔬菜:

甜品:

松露木糠

朱古力噴泉:用了黑朱古力,糖份低,不過好能有人會縑佢苦!

松露焦糖燉蛋

依家好多酒店自助餐連飲品都係自助,基本上我唔飲!因為自斟嘅奶茶/咖啡唔夠味;此店係沖埋俾你嘅,味道係唔同啲嘅:

此店最值得推介嘅係:用餐時間晚上六時至十時半(一般是六時半至九時半);即使我地果日星期五去,都唔會人迫迫!星期一至四是$498,但係食物會唔會差左,就不得而知!

我同姪女都認為,響啲咁嘅地方,有啲咁嘅質素,價錢真係唔貴!其實佢加塊窗簾遮住街景咪得囉!

不過,我同姪女講:你走之前都唔好再食自助餐啦!搵自己個肚嚟辛苦。

今早見「百樂酒店」做緊六五折,另一間亦做緊七折,看來香港經濟真係好唔掂!

回應 (2)
我要發表
2016/04/04 10:27:39 回覆

啱食嘅,幾味就夠啦!

2016/04/04 08:31:48 回覆

咁啱我又po左自助餐相,不過係brunch,食物同你d差天共地,差太遠啦,香港美食太吸引!

user