木瓜雪耳花膠湯

前日竹戰。賽果？正常過正常囉！

今次一早煲定「雪耳木瓜百合糖水」，等候俾人劏。煲好攤涼佢，一半放雪柜、一半保留室溫，咁食果陣咪可以各適其適囉(幾咁貼心)；不過人算不如天算，原來佢地都喜歡凍食(因為果日都幾熱，我都要開冷氣咯)。冇問題吖---下午茶時每人食左一碗凍嘅先、再將另一半放雪柜，待晚飯後當甜品食埋佢。

當日響生果店用十二蚊買左一兜三個熟木瓜，用左兩個，剩番一個，尋日咪買料煲「木瓜雪耳花膠湯」囉。

據瓜檔檔主稱：煲木瓜湯用青木瓜較香、用熟木瓜較甜。不過，一般而言，我買一個木瓜便夠用，所以我多數買青木瓜煲湯；今次因為有個用剩嘅小熟木瓜，所以買個青木瓜一齊煲，咁咪又香又甜囉。

材料：(睇吓個陣容就知並不便宜，基本上依家無論係食菜定食肉都好貴)

青木瓜一個

熟木瓜一個

唐排(買左五十蚊)

花膠(一次過浸發好，要用咪攞啲出嚟用囉)

雪耳

南北杏

芡實(可以不下，不過佢可以固腎。反正屋企有，咪加埋囉)

蜜棗/無花果(我用呢隻無花果好大粒，買果陣檔主都話佢貴)

果皮/薑

水滾下材料再大滾十分鐘，轉細火煲2 1/2小時。