是進步、抑或是倒退？

請恕我食古不化，我認為現今年青人的表現，是教育界與家長做成！

想當年(一個人有番咁上下年紀，就喜歡想當年架啦)，渠務/水務工程冇現今咁理想、天文台預測天氣的儀器亦不及現今先進；所以每逢下大雨，很多街道因雨水積聚，途人便需涉水而過；那些年，亦沒有所謂黃雨、紅雨、黑雨這回事。家長/學童祇知道八號風球才不用上課。

我讀小學二三年班那時，每逢下大雨，便要涉水(及膝)上學、中學時更試過涉及腰水上學。當年的選擇，便是上學、抑或唔上學？以前，我阿媽唔會俾我地兄弟姊妹缺課。但是現今受保護的一代-----淋雨怕濕身、著涼、病，唔駛子女出聲，家長同教師都大聲疾呼，大罵天文台何解唔早啲叫停課？我當年都唔知濕過幾多次身，不過好彩又好似未試過因此而病喎！反而更經得起風浪。當年份政府工，人地八號風球唔駛上班，我十號風球、黃雨/紅雨甚至黑都要輪班，咪一樣冒住風雨返工(雖然當時好多同事都唔接電話，避免當更)！我好慶幸：自小鍛鍊，令我懂得應付逆境。

因此，現今一代，唔識得保護自己(因為自小到大有人保謢，仲唔收保護費)、唔捱得(又怕風吹、又怕雨打，真的變成東亞病夫)、教育水評亦下降(因為家長唔想子女辛苦，所以咩嘢試都唔想佢地考，但係自己就迫子女學呢樣、學果樣)、唔識人情世故(你睇吓吖！響公共車輛肯讓座俾長者嘅大多係中年人士，年青人時運高，睇長者唔倒)、冇責任心(返工望放工！你叫佢OT，冇錢當然睬你都傻，即使有補水佢地都嫌辛苦，而且分分鐘會收倒佢地阿媽嘅電話，投訴你虐待員工添).................

父母愛護子女，當然無可厚非，但係觀乎現今年青人的表現，大家是否應該停一停、諗一諗：家長的表現，是愛、還是害？不竟，將來的路，子女需要自己行落去，家長保護可以到永遠咩？而且，子女在這種環境長大，很自然亦會用同樣保護、甚至有過之而無不及的方式教育他們的下一代，那麼......