黑色星期五

2016/04/16 11:33:17 網誌分類: 生活
16 Apr

尋日星期五,雖然不是十三號,但對我來説:卻是黑色星期五!

姪女四月一日來港,住響我度。前個星期約同幾位書友仔去日本旅行,講左昨晚(15號)回港;早幾日whatsapp告知,已改機票,星期一18號晚才返。

原本佢大人大姊,佢去邊我都唔會干涉,亦唔到我干涉吖!偏偏前晚新聞報導:日本熊本縣大地震。我即時whatsapp佢,問:「地震喎!你OK?」

好彩佢即時回答:「吓!地震?邊度?我睇唔倒電視。」

之後佢答剛回名古屋,熊本相隔好遠。

佢地幾個係自由行,真係唔知佢地挑起條筋會去左邊?而且,今次七級地震,尚有大大小小餘震,真係擔心架!如果係我,我一定即時返港!嘻嘻,講嘢呀?識我嘅人都知,我根本唔會去日本旅行!

都係果句啦:大人大姊,都唔到我理啦!於是講:「尚有餘震,小心!」隨後佢便好像人間蒸發左咁:冇聲冇氣!

尋日係我地中學同學每月聚會。今次我一早應承左整「醉豬手」俾係書友仔食,當時有書友仔問我取食譜。我表示:我第一次整,我覺得好食啫!等你地食過俾埋意見(睇吓份量駛唔駛調整),我才提供食譜啦!

整醉豬手(在食譜分類介紹過)唔係難,但係工序好煩!要早一日整:偏偏我星期四上午同晚間都要上課,而豬手最少要煮兩小時才夠稔,又要過冰水冷河才可滷浸,所以星期四下課後,連茶都冇飲(平日我會同書友仔飲茶吹吓水)便打道回府,因為夜晚放學後整又唔夠時間入味!

尋日早上,將浸左一晚嘅豬手放入雪柜才出門食早餐(浸豬手前十二小時不能入雪柜)。誰知剛出門便收到其中一位書友仔whatsapp:咳到飛起,相公禁止出門!

十時左右,另一書友仔告知,S書友上午出門上跳舞班途中扑倒,由途人叫十字車送院,未知能否趕及下午的約會?

S是我們聚會會所的會員,如果她不能來,我們便不能去會所聚會,但大家都唔想取消約會;最終決定:如果S唔嚟得,便在我家聚會竹戰。

我地一直與S聯絡。但係入得急症室(特別係依家)最少都等十個八個小時啦!所以結果咪嚟我處囉!

今次我整醉豬手、一位整芒果布甸、一位整合桃香煎鬆餅。我預左每人兩件豬手,書友仔E話預佢食一件,但係食完一件之後問:我可唔唔以食多件?

我答:當然可以,因為我預左每人兩件;依家兩位冇到,有人可以食三件添!結果清左碟。

佢地不斷讚好食。佢地最欣賞係一點不肥膩,豬皮與筋係骨膠原,啱晒我地年紀食。我順便講個食譜俾佢地聽,而且告知浸完豬手嘅酒滷可以番用,亦可以浸雞翼、鴨脷(浸呢兩樣工序簡單得多)....結果,V書友仔第一個舉手要左我樽酒滷。佢地一致認為雞翼同鴨脷不及豬手健康。

竹戰結果?又係正常囉!輸得少吖---廿幾萬之馬!

我地雖然一邊打麻雀咋,都不時打電話俾S查問佢最新情況。真料不到跌一跌咁傷---膝蓋骨碎左,要排期做大手術!但未知排到幾時,依家佢郁吓都痛。佢又有番咁上下重量,希望佢早日康復啦!

今早食早餐,買餸時盤算著回家俾個電話姪女,免得心裡忐忑不安!回家時睇吓whatsapp,咦!姪女剛剛上線喎----咁即係冇事啦!於是連電話都慳番(佢響下午終於報平安啦)。

 

回應 (3)
我要發表
Auntcat
Auntcat 2016/04/17 11:18:29 回覆

我就係奇怪囉!無謂寄咁麻煩吖!多謝好意!

VanYYY
VanYYY 2016/04/17 10:14:52 回覆

sorry. 打錯字!係我買左....(如果你要,可以代你買嘅;不過唔知寄唔寄得倒!)上次我姪女返美,我都託佢帶一個俾我大佬。

開心van仔
開心van仔 2016/04/16 15:17:43 回覆

我聽過幾個人一跌就斷骨!真的要小心行路,特別上落樓梯,不能急架!

我尋日也是竹戰,唔見130個大洋!

user

最新回應

立 冬
立 冬 2018/06/13

新版都有好處的, 至少用手機來睇會較以前方便.  你休息夠了再回來啦!   {#iconb_21}

VanYYY
VanYYY 2018/05/24
@域 流亦詩...

雖然我封舉,有空仍會拜讀你的大作!

KING.
KING. 2018/05/19

都要改啦, 以前頭條blog都唔係mobile reponsive web. 而家改左,你有冇發覺冇以前咁棘.

域 流亦詩
域 流亦詩 2018/05/18

祝你身體健康、愉快。它朝有機會再在博海相見!