靜靜起革命
2016/04/18 08:43:02 網誌分類: 經濟
PP變身翻兜本地客
最近，有中環茶友投訴，話佢浦開嘅太古廣場（PP）大執位，兩間做咗好耐嘅食肆DANRYAN'S同GRAPPA都被大業主踢走，搞到有班老名熟客嘈到拆天。有人奇怪，今時今日乜仲有業主要大加租咩，點解兩間鋪頭會唔做呢？但聽聞內裹另有別情。
呢兩間餐廳食物水準唔算好，但亦唔算差，陸羽仁幫襯過，感覺佢哋生意唔錯，好多時唔定位就無得入座，照計應該有得做。今次太古同兩間餐廳傾唔掂，主要唔係租金，而係大業主希望兩店執執間鋪嘅裝條，配合成個場重新訂位，但兩間鋪相當有性格，覺得無乜需要改變，於是雙方拉倒。太古點解要重新定位，主要係有個意見，話太古廣場食肆唔夠，未來希望增加番多啲。
通常商場搵食肆，除咗租金外，仲會考慮人流因素。坦白講，陸羽仁都少行咗PP好多，主要係覺得佢呢幾年名店不斷增多，仲係最頂級嗰隻，呢類超貴價嘢一年買幾件就乜到夠啦，咁點使成日去行呢？好明顯個係針對大陸市場，吸引強國富豪。而家內地有錢人少咗嚟香港，呢個情況估計一年半載都唔會改變，所以太古就靜靜起革命，執番個場遷就多啲本地消費囉。
水淺就要行細船
所以話，上個星期股市表現唔錯，有搞經營嘅中環茶友大歎投機容易，生意惡做，呢個亦都係實況，學長實集團主席李首富話齋，而家做生意難過沙士，皆因自由行同外地遊客少咗，但租金人工仲未跌，實牙實齒做生意唔係咁易。而家太古旗下嘅貴場都咁執生，其他貴場大業主，睇怕都要自己諗計。由咁嚟睇，品牌零售股同商場股，短期都仲未係撈底時。
講起暗暗太古變招，在座咗一名茶友話，最近佢睇咗本由太古集團出版，講述一百五十年來呢間老牌洋行營商之道嘅書《太古之道》，都有唔少啟發。太古創辦人施懷雅（SWIRE）家族雖然係老外，但行事深明中國人易經虛實互應嘅智慧，既識搞實業，又識利用資本市場變化莫測嘅市況，不斷壯大自己實力，中國人話富不過三代，施懷雅家族現時領導太古的約翰.施懷雅已經係第六代，你話犀唔犀利。
太古由船務起家，第一代公司叫藍煙囪（BLUEFUNNELLINE），而家尖沙咀新世界中心的黃金地皮，都曾經係公司名下物業，後來先至賣咗俾新世界發展老闆鄭裕彤。係《太古之道》呢本書中，記載咗當年令太古航運崛起的功臣晏爾吉提出的航運十條，其中有部份係而家用嚟做生意以至炒股都有用。其中一條係第四點講，買船時須認清性能和用途，內河水淺貨少，大船不宜，應用於水深貨多的外港；船子載貨則不多，難與人競爭。間單講就係做生意要執生，水淺就要用細船。用呢一個想法比喻炒股，藍籌穩陣而本大，係股市不明朗時發揮有險可守之利，但升跌幅度不如股仔二、三線；股仔二、三線在好市時進銳退速，但跌起來隨時沒頂，只宜在旺市作短暫投機，係乜嘢時候炒邊類股份，往往決定回報高低，以至最後勝果。
另外第五點講新船燒煤少而行速快，千萬莫貪便宜買舊船。而家國泰經營航空，機隊身價成千億元，仍然係維持呢個原則，不時購置慳油新機。至於用嚟買股，可以話好股無平、平股難好，買股千萬唔好「聽聲唔聽斗」，見到價平息高就撞埋去。
「好酒好蔡」好刁鑽
講開太古廣場呢次請走兩間老外們的集體回憶，據聞有個舖位就租咗俾麗新老闆林建岳，岳少準備開間意大利餐廳。問食肆開到成為米芝蓮八星上將嘅岳少，之前話題作係引入內地著名私房菜「好酒好蔡」，選址在中環建行大廈，明顯是行高檔商務路線，有人話間舖位置雖然吊腳，但同咁大間建行做鄰居，淨係靠銀行帶挈生意都應該夠做啦。
蔡昊主理主修化學
好酒好蔡由蔡昊主理，他本身唸化學，不是大廚出身，正因如此，所以為傳統潮菜注入新的烹調方法。好酒好蔡特色是強調食材先行，菜單按店方每日買到的食材決定，同時很少煎炸食物。
陸羽仁有機會試過兩次，覺得佢味道唔錯，但風格有啲「姿整」，最有印象是紫菜魚餅，做法有點類近日式天婦羅，不油不膩。另一矜貴菜式是白灼響螺（見圖），蔡昊的做法是一隻螺只起一塊螺片，他堅持這個菜式不用時興堂灼做法，皆因堂灼限制了清湯份量，多灼兩片就變成不夠滾，他寧願在廚房用大煲灼好，限秒送上。如此刁鑽做法，造就了一螺一片、厚肉彈牙的口感。
岳少係潮人，一早開咗間「潮樓」，好酒好蔡擺明賣老牌概念，蔡昊唸化學，很多食制他都加入學術觀點，例如他賣潮州翅，認為對男士前列腺有益，但魚翅白色部份膽固醇成份最高，故此建議只食翅針。所以，「好酒好蔡」是此蔡不同彼菜，老闆受過教育，入廚理論多多，食得刁鑽有話題，是該店賣點之一。?家淡風吹起，好多人荷包有錢，但就無興趣飲食，而家可能就真正考驗，蔡老闆點樣變身做開胃蔡。
陸羽仁
回應 (0)
我要發表