有開工、冇收工?

2016/04/22 08:16:06 網誌分類: 職場
22 Apr

以前返寫字樓工的稱為白領,勝在放工準時。以前白領階級返朝九晚五,每星期返五日半,所以人人羨慕;相對而言,藍領(指在工廠工作,一般返朝八晚六,星期六亦冇長短週)工時較長,前途似乎亦冇白領好,所以以前女士揀老公,個個都希望嫁個白領階級。

近呢廿年,由於內地工資較低,買地設廠又較便宜,很多工廠將生產線北移,所以依家香港基本上都冇咩嘢工廠,藍領甚少,有的多是技術人員!

但不知何故,依家啲白領總是投訴工時長:有返工時間、冇放工時間!

我在政府工作了幾十年,基本上前果廿年都可以準時返工、放工。何解?因為我低級囉(唔係低B)!我印象中,越高級(理論上責任重啲)越遲收工。

政府工,越高級、工作時間越長!你睇吓依家做局長果啲幾惨吖----要出席垃圾會,人家拉布、每次開會唔知開到幾時(人地拉布果啲就知啫,局長祇得任人魚肉)!議棍鍾意離席便離席、歸位便歸位;但身為局長,唔可以話走就走,亦唔知幾時可以走。差不多俾人非法禁固!工時長又如何?雖然我都好同情佢地,你估坐十幾小時好舒服呀?唔係佢地想白抖人工架,咁坐法都好辛苦啫!

高官唔走得至喎!好處係佢嘅下屬見老板唔響處,可以準時走、甚至早走喎!你估個個打工仔都好似我咁自律架(換個角度睇,係我蠢啫),係咁,呢班公務員係咪都要多得果班議棍呢吓?

放工唔準時,很多人歸咎於老板唔放人;以我的經驗,老板唔放人、祇係原因之一。有些上級因為自己唔走得,要搵人陪葬,所以亦唔想下屬準時收工,呢啲咁自私嘅老板其實唔多;下屬最緊要交貨準時啫,留響度、做唔倒嘢都冇用架!但更多情況(我眼見響私人機構發生)是下屬見其同事唔走,所以亦吾敢走!更多的是他們/她們約了男/女朋友晚飯睇戲未夠鐘,於是便扮勤力,留響寫字樓等時間。因此,這些所謂超時工作,是員工自己做成。

姪女在上海工作了十年,據她說:上海寫字樓的同事很準時放工,而且上海人市民食晚飯時間較香港早(香港一般約七時半),同事即使約人食晚飯,亦會約在六時三十分。有一次姪女六時半尚未走,即有同事問她是否要開夜?自此之後,她都寧願準時放工,免得有異常人。香港某些人總認為香港較內地優勝,這些人會否改變,考慮北上工作呢?

個人不贊成同事冇必要遲收工,當然,在社會工作一定有些情況是有需要超時工作需的-----好像政府庫房每年三月尾要埋年結,便有需要超時工時作,因為要在短時間内完成大量工作。當年我每逢選舉前後,便需連續工作超過廿四小時!可能你以為有額外薪酬,但我試過有幾次、即使無薪,我一樣需要當值。做人又唔可以吓吓計較嘅(咁咪蠢囉!但係做人斤斤計較,唔辛苦嘅咩?)但在正常情況下,如果一個人晚晚要超時,才可以完成正常的工作,祇有兩個理由:一是此人工作效率特別低、一是那份工作根本不應由一個人處理!試吓客觀啲睇:你屬於那一種?如果同樣的工作,人家可以準時走、而你卻不可以,咁就唔駛問阿貴啦!

我的其中一位老板亦表示過:如果冇特別情形,下屬留後唔走係浪費緊資源,最主要係電費!

此外,依家大部份寫字樓都係五天工作。政府以前返五日半,近年改左五日,所以將原本星期六果半天工時(約四小時)分攤至星期一至五,所以依家辦公時間並非九至五,可能是九至五時半、或者八至五.....看似工時長了,實際並非如此。

回應 (0)
我要發表
user