齊撐本地飲食文化 少年食神 Michael：營商要講心！

        時代變遷，隨着香港營商環境愈來愈惡劣，很多傳統食店因捱不過貴租而相繼結業，令人唏噓！說到香港飲食文化，「少年食神」林澄光Michael跟我一樣重視人情味，首選光顧地道雲吞麵店、大排檔、茶餐廳，「相信每個出街食嘢的人都想用最低價格追求最高質素，我鍾意去佐敦麥文記食雲吞麵，也會到元朗屏山華嫂冰室食碎蛋治，你會食出那份心意，他們講究用料質素，絕對值得推介。」

        主持：黃柏高
        統籌：林永匡
        協力：彭子僖
        攝影：袁東亮
        場地：圓山台灣料理（電話：27219833）

        當傳統老麵店陸續成為港人集體回憶的同時，林澄光Michael非常有心地自設麵廠，找老師傅日日擀麵，把優質靚麵餅送贈親朋享用，「因我由細到大都鍾意食蝦籽麵，過年過節就送給朋友享用，其實食飯最重要人腳，其本上我甚麼都食，近年就開始戒牛肉，初一十五更會食素，早前ViuTV找我開新節目《走肉朋友》，可惜我今年要開三間店，實在走唔開，但年尾可能會做一個革命性的旅遊節目。」Michael說的三間店包括在機場T2大樓開設東來居、魚蛋粉和酒吧，還會在元朗自置地開設泰潮旗鑑店。

        極愛華嫂冰室

        每次跟Michael談食經都有驚喜，作為麵癡的我最愛到佐敦麥文記食雲吞麵，全蝦肉的雲吞配優質彈牙麵條，絕對百食不厭，「現在已做到第三代，跟同街的澳洲牛奶公司一樣是自置物業才能做得住。今時今日營商最困難係舖租問題，其次是對食物出品的要求。我去泰國鍾意食雞飯，所以在香港開泰潮，賣的海南雞飯要過到自己先會推介。我知香港人鍾意去茶餐廳食飯，貪乜都有得食，但有時看到那些浸到脹的公仔麵真係食唔落，我鍾意去屏山華嫂冰室食，因為當人家用$0.8隻雞蛋時，華嫂會用$3.3隻荷蘭蛋煮畀你食，食落就知那陣蛋香確係唔同，我也愛到圓山食點心，那些切粒燒賣和肉餅很出色，很怕食工場出品的點心。」老字號食店，Michael還推介太子鳳城酒家。

        香港拉麵不合格

        剛為TVB到韓國拍攝旅遊節目的Michael笑言當地海鮮出色，但做法出錯，「節目以賞櫻花為主，但我這肥仔當然要帶大家去覓食，講解海菠蘿點食外，香港人最鍾意去食海鮮，我發覺韓國水溫凍，鮑魚脆口彈牙，可惜韓國人就切粒煮食，我反建議阿豬媽切片煮，口感完全提升。」食神唔係識講兩句就得，Michael早前替日本擔任拉麵評審時，便連食500碗麵拉麵去測試評選，那香港拉麵店質素如何？Michael說：「香港最出色，排隊排好耐的拉麵店都食勻，但始終差少少，比如湯的溫度、牛肉韌度，甚至麵條質素都有點瑕疵，我可推介位於東京新宿的AFURI拉麵店給大家，每個朋友食完都大讚，一出新宿車站向左斜路上行再轉右，開早上10點收凌晨3點，麵條用小麥粉自製，那嚿肉用滷水浸好，食前用炭火燒下，湯汁係醬油加柚子醋，以減低食肥豬肉那種罪惡感，大家有機會都可以試下。」