萬達商業的A股夢
2016/04/25 10:12:40 網誌分類: 經濟
港交所炒深港通開啟，不少內地巨企就已經喪失在香港掛牌嘅興趣。萬達商業（3699）在上月底提出把萬達商業私有化，過去一個星期已密密有動作，股價仲隨之升越咗當初上市嘅招股價48元，收報51.25元㖭。
度水私有化描寫風情畫
萬達商業來港上市後，股價長期潛水，當提出私有化後，有心懷疑係咪借呢個機會調資來港，甚至講到整個行動已引起注目，但亦有傳出話係內資股股東一致強烈要求回歸A股，認為內地投資者更了解公司的業務，作出更合適的估值，公司因為正積極籌備回歸A股事宜，決定「棄H回A」，提出私有化。有內房商高層同陸羽仁傾起，萬達要做得成呢次交易，都要表演唔少財技。
當前一大障礙，係私有化要大筆現金，但現時內地嚴控調資國外，惟有在境外籌集足夠資金。而家香港市場大把水，但點樣搵到平錢肯借畀內房公司就係技巧嘞。外電就引述母公司嘅文件話，公司要集資私有化在香港上市的萬達商業，其後再到上海上市，相關籌資經已獲得超額認購，並會成立特別目的實體進行籌資，願意參加的投資者須支付20%保證金。如萬達商業退市後，兩年未能在內地主板市場上市，萬達集團將回購全部股份，並向海外及境內投資者分別支付12%同10%的年利率。
萬達今次向市場集資，有個講法係若然成功回歸A股，管理層估計股價可以翻二三倍，可能因為呢個傳聞，所以萬達商業股價由上周初集資開始後就持續攀升，比起剛宣佈考慮私有化時，差不多再升咗三成！
呢位內房層話，萬達差不多係六、七年前曾向大陸企業籌資，當時融資環境好唔同，佢等唔到係A股掛牌，於是走來香港上市，可惜掛牌後股價潛水，令公司完全喪失咗利用股市再融資嘅功能，加上而家在內地發行人民幣債好平，根本用唔到香港集資平台，係咁嘅環境下好多內地股東覺得香港投資者唔識寶，寧願退市返大陸玩。
衝破招股價功課交到足
如果按照呢個講法，萬達商業退市對港股當然唔係「老黎」嘅徵兆，唯有期望市場氣氛時時變化，遲啲香港氣氛好轉，內企又會覺得香港可以幫到手搵銀啦。萬達今次回歸A股若然成功，可能會觸發其他民企考慮，好似市場而家都傳緊恒大（3333）想係A股借殼。雖然佢唔會香港退市，但搵多個市場抽水就一啲都唔奇。萬達商業私有化而家交突咗，而家距離掛牌高位78元，如果公司講到「棄H回A」咁正，咁想退市係咪唔可以太寒酸呢？由於佢股價借住呢個概念係咁炒上，唔排除往後仲有啲公司會炒吓呢個回歸A股嘅概念。
講開回歸A股，其實呢排大陸個市都唔係咁好，令A股比H股的高水降至僅29%，是近半年內首次跌穿30%。反映A股及H股差價的恒生AH股溢價指數，曾跌至129點的半年低位，顯示A股整體股價較H股高出29%，與1月份的今年高位46%比較，差價大幅收窄。內地人多錢多，股票估值一向高過香港，內地應該貴好多先係正常，如今是港股夾高內地唔跟，主要係大戶挾高匯控殺淡友，由於大笨象無喺內地上市，變成唔跟走勢，香港呢個夾倉遊戲，要玩埋今個星期到月底期指結算。
日式文化豪宅
很多年沒有參觀新樓盤，皆因現時新盤都請代理促銷，未入門已被包圍，若然只是想參觀，無謂阻人時間，索性避之則吉，少看罷了。這個星期有朋友邀請看港島天后一個豪宅，講明物業幾百伙賣剩十幾伙，不會有代理迎門，於是欣然成行。
呢個樓盤有四幢大廈，在北角算是難得的大型項目，今次行程參觀了身價六千萬的高層單位，同行者笑言，有六千萬不如退休享受，何必買貴樓住近市區？現實是呢個盤起跳價接近二千萬，買樓者可能是富二代，可能是大把身家。當你身家去到億億聲，是否就可以日日打高球過日辰呢？之所以有人會用幾千萬逼喺市區置業，呢啲叫做子非魚，不知魚之樂囉。
禪意設計「烏卒卒」
六千萬買個半遮海景單位係咪值得見仁見智，但一個咁嘅豪宅住落唔算好寬敞，呢個係事實，所以而家賣呢啲豪宅，唔可以好似土豪年代，以金壁輝煌豪裝作為賣點。跟身嘅導賞人員就強調，新世紀物業，則主打文化內涵和生活體驗。呢個樓盤就用了日式主題設計，邀請了大師由園景到擺設打造禪意空間。如果從凡夫俗子眼中去睇，就會覺得大廈大堂同會所好似有首兒歌叫「烏卒卒」，有啲唔夠光猛。當然，呢啲係傳統見解，認為買樓要四正光猛，如果睇番太古嘅樓王OPUS扭到好似脆麻花，一樣唔減財主置業興趣，咁呢個盤就可以話領導潮流嘞。
睇樓行到腳仔軟軟哋，主人家誠意拳拳，在茶室請了茶藝大師煮茶，同時有專人即席製作的精美和菓子奉客。茶藝大師當日烹煮的是日本煎茶，煎茶經過烘焙，入口帶甜。廣東人品茗愛說水滾茶靚，大師介紹日式煎茶水溫要調控，不是水滾就好，既要熱杯，水也要降溫，恰到好處。沖好的茶，可以立即入口，煎茶比中國茶多了烤烘香味，舌尖受用外，嗅覺都感到清甜氣味。
飲完茶，師傅仲送咗篇《澤庵茶論》畀大家，呢篇文章話「夫天地中和之氣，實茶道之本原；安邦治世之風，乃茶道之功用」，講到咁緊要，所以飲茶由地點到沖製皆有講究。《澤庵茶論》咁嚴肅，今日好多人都做唔到啦，所以師傅送嘅另一篇《煎茶道要略》似乎實際啲，至少睇到尾會知道，「若論雅俗共賞、冑民同悟…當推煎茶」吖。
煎茶道要略
日本茶道的源流總歸宗於宋代茶文化，復演為「抹茶道」與「煎茶道」。其要曰︰禪悟。故真正的茶道，無論哪一派別，都同樣是以參學（開悟之道）為事。
「抹茶道」的創立者是足利義政時代「奈良流」的名人村田珠光、一休和尚的傳人。而「煎茶道」則由明朝人隱元禪師於明、清易代之際，渡海至日本開創黃藥宗並「煎茶道」一派。其實煎茶之法最遲於日本鎌倉時代（即中國南宋）已經出現。今天的「小笠原流」就是擁有這樣悠久源流的派別。
時至今日，「煎茶道」大都以平人茶、草庵茶為主流，而「抹茶道」則反為官院之茶。然既為茶道，必以「侘」、以禪為歸，其別惟「抹茶道」較重儀規，「煎茶道」較重心法。若論雅俗共賞，齊民同悟，且與中國當代泡茶法度共融相合，有志於此道之士，當推煎茶。
陸羽仁
回應 (0)
我要發表