紅磡五芳齋
2016/04/26 06:55:03 網誌分類: 講飲講食
五芳齋位於紅磡蕪湖街「逸酒店」地下,開業大概有半年。
我初時路過有個疑問?是食齋的嗎?雖然店外貼了很多食物照片及餐單,但大家都知,依家齋鋪一樣有叉燒包食架馬!可能呢個係大眾嘅疑問掛,依家見佢貼左張告示響門口,寫明:此店並非素食!
姪女問我有冇光顧過呢間?我答都唔知佢食咩嘢,所以冇咩嘢興趣。
姪女答:「五芳齋」響上海很有名,最馳名係糉。佢將網上搵倒嘅食物照俾我睇,並叫我試試。
上星期六中午十二時到達,此店俾人嘅感覺係快餐店feel,鋪仔細細,祇得十多二十張細檯,還好服務不差。
既然佢出名係糉,梗係要一試啦:廿蚊隻。細細隻,不過幾好味,有外表、亦有內涵:
香港人食糭,通常會醮沙糖或豉油食。呢度冇得供應,不過其實隻糭本身都好夠味!
姪女曾經多次問我:「有冇食過薺菜?」
我答:「未!」薺菜有季節性,祇在南貨店有售。我因為未食過,唔敢買嚟試。所以見餐牌上有薺菜包,咪一於試吓囉!$28三個,飽皮睇落唔係咁靚仔,但係又幾好食,裡面嘅薺菜仲好青綠。試過之後,第日可以買嚟自煮。
酸辣湯麵。姪女叫嘅,我講明佢要自叫自食,辣嘢我唔會幫拖!佢話好食喎。
南瓜餅,一客三件。食味唔錯,南瓜做皮,裡面係豆沙;我略縑佢炸得燶左少少,不過食落都OK。
醉雞。肉太「鞋」!我整得好食過佢。
拉花咖啡?有冇攪錯?我見倒網上照片都係咁問。
不過,真係有,姪女覺得咖啡唔錯,祇是未夠濃!姪女飲慣特濃咖啡,佢嘅口味不能作準!
我地食完一點幾,該店仍未滿座!星期六喎,姪女覺得奇怪。
我答:雖然此店每日有特價午餐(每日三款,四十二蚊),但如果要食客飯,我相信顧客寧願選擇一街之隔的「上海喬家栅」;光顧此店,除非是特別喜歡吃糭或者好似我姪女咁:又想食中菜、又要飲咖啡,才會有興趣光顧此店。
埋單二百五十幾蚊。
說的是呢!改壞名。
五芳齋無齋食。
民主黨無民主。
哈…