板長壽司

2016/04/30 07:42:22 網誌分類: 講飲講食
30 Apr

熟悉我嘅朋友都知道,我係唔食壽司嘅!原因係我唔食wasabi,很多廚子在魚生及飯之間放了wasabi;我曾經中過招,所以之後都唔敢再食壽司---咁算唔算係因噎廢食呢?

姪女來港暫住我家,期間去吓旅行,玩罷才返美國。佢話要趁住留港期間食遍紅磡/黃埔區咁話喎-----咁我咪要捨命陪姪女!咁食法?我吾掂架。

咁啱我家附近剛搬來了「板長壽司」,原本在黃埔花園,說遠不遠,但因為佢個店名有「壽司」兩字、而我又唔食壽司嘅,因此佢響黃埔開業幾年我都冇幫趁過!

早兩晚姪女冇約人,晚飯佢建議嚟呢間試。我係順德台山人,當然冇異議啦!抵達該鋪尚差五分鐘便是七時,眼見已差不多客滿,遲一步便要等位。

依家食店時興電子落單,啱晒年輕一代:與時並進!

老眼昏花:影到矇查查---手卷!姪女叫嘅。我一早叫佢唔好制啦:果片紫菜一定「靭」,佢不聽老人言,結果....

呢款廚師推介:海膽三色迷你飯--好食!

加州卷:好食!

壽司:我唔食嘅!所以唔知好唔好食。不過,啲海膽好靚!

估唔到原來有烏冬食:蕃茄牛肉烏冬--好好味!好食過果間「藏?麵」啦。

刺身少不了:

炸芝士鰻魚卷:都好食!

軟殼蟹沙律:好食!

西京比目魚:都好食!

甜品:選擇唔多,得三款!我地叫左「北海道牛乳布丁」同「芝士蛋糕」,剩番「蕃薯」冇叫。

甜品好一般,唔食冇損失!姪女食牛乳布丁,佢話日本人時興加入黑糖食;我告知依家台灣都興食黑糖。

姪女:「台灣人學日本啫!佢地俾日本統治過,不明何解偏偏喜歡學日本人啲嘢!」

我:「有咩嘢出奇啫!香港曾經俾英國統治,我夠唔明點解啲人咁鍾意拿住枝龍獅旗啦!」

姪女:「呢啲人慣左做人奴隸!」

芝士蛋糕實物較照片細好多,有點貨不對版的感覺!

說真心話:呢度食嘅嘢較一般日本店便宜,但質素唔差!啱晒我呢啲cheap人,平日去食個牛肉烏冬當晚餐都OK架,每客$42。

美中不足係該店暫未申請倒酒牌,姪女冇酒飲,好失望!

埋單五百蚊,至貴咪果碟剌身囉!

回應 (1)
我要發表
2016/04/30 17:03:06 回覆

無一樣啱我食!我的孫很鍾意食蛋壽司。

user