紅磡九重鮮

本人謹在此解釋：我曾表示會杯葛一切與韓國有關的用品、食品...五年，即是要到2020年才可以解封。今次真係捨諾言陪姪女架！因為佢留港時間唔多，今次離別後，不知何日卿再來咯；佢又講過要食盡紅磡食肆，又見佢好似幾想試吓呢間，咁咪惟有....不過，食完係咪要罰我再將封限期延長多一年呢？

我之前介紹過紅磡間「皇朝」食蒸海鮮火鍋(2016年1月8日講飲講食網誌分類)。結論係：好食就好食，但係食得太急，至在傾計嘅就唔係咁啱。

「九重鮮」與我住處真係一街之隔咋，開左幾個月。因為之前食過「皇朝」，心中總有個疑問：韓國又有蒸海鮮？究竟邊個學邊個？今次選擇佢，除了因姪女想食之外，我都想滿足吓自己嘅好奇心。

入門之處：

門外地下：

門外佈置：

內部裝修：

下面果枝竹籤唔係牙籤，係用嚟挑海螺肉嘅：

木做的餐牌：

選擇不多。基本上得幾個餐，由每位二百幾至五百幾。我地揀左呢個中間價配韓國豬手湯：每位$398。要加菜便要另外加錢；不過，其實個餐本身蔬菜都唔少，個人覺得冇咩嘢必要再加。

韓國啤酒：另外加錢

豬手湯連米先放鑊內，上面再加上九層海鮮塔(因為蒸熟嘅時間不同)：

餐牌有教你每層蒸幾耐，餐廳亦提供左一個計時漏斗俾你；不過我地最初係唔記得用個漏斗，後來係覺得冇需要用個漏斗。因為侍應到時到後會幫你：

前菜：可添加.。見倒呢啲配菜才記起此店是韓國菜館！

睇吓個陣容！情侶不宜啦：成棟蒸籠放響中間遮住視線---由頭食到底下兩曾先見倒對方，有咩嘢意思呢？似乎啱果啲老夫老妻---又要一齊食、又唔多想見倒對方....

第一層：都等左成廿分鐘至有得食，蟶子好食，另外果啲唔知係咪象拔蚌，有啲靱！嗱：都話好多蔬菜架啦---蕃茄、菇菇...

第二層：扇貝好食！

第三層：蝦同蜆---其實好多層都有啲蜆狀嘅物體，我真係分唔倒？貝、？貝..           啲蝦好大隻，好好食，但果啲蜆就殼大肉小，真係冇啖食！

           嗱！又有菇菇...

第四層：呢個我識---係北寄貝同龍躉，好食！又有蕃茄、木耳、娃娃菜...

第五層：花蛤？係掛！啲木瓜好甜。

第六層：蟹---每位半隻。蟹係成晚較差嘅海鮮，啲肉好「削」！又係菇菇..

第七層：鮑魚出場，配上蘿蔔、日本蕃薯同鮮冬菇---蔬菜好食過鮑魚！要食好嘢？加錢改食南非鮑囉！

第八層：海螺、？貝、粟米、娃娃菜、日本南瓜..

食完海鮮輪到底層嘅豬手粥(又係有蜆)。味道唔錯、但賣相麻麻，冇咩嘢色水(咁你可以選人參雞湯、又或者加錢....)！我同姪女都覺得皇朝個粥加左芫茜同蔥較香。

埋單：餐價+啤酒+加一服務費。(食唔晒，餐店歡迎你「打包」拎走)

姪女問我俾幾多分佢？我答：我從來唔俾分，祇會講邊樣好食、邊樣唔好食。咁你俾佢幾多分？(咁咪連消帶打囉)

姪女：四分！

我：五分係滿分？

姪女：係。

我地同感：「皇朝」海鮮比較新鮮，但係食得急！此店雖然聲稱要計時，但係時間好似唔係咁緊張，一般而言，要食兩小時(多都無！此店6:30同8:30兩個時段)----第一層都要等成廿幾分鐘啦！不過其後果啲續層食，都冇理時間咯！

價錢同食自助餐差不多(咁梗係計有推廣果陣啦)，咁我寧願食自助餐！不過人一世、物一世，咩嘢都試吓囉！