港女

家兄一家於三十年前移民美國，姪女姪仔十多歲便接受外國教學，在美國成長。

姪女完成碩士、博士課程便回港工作幾年，其後到上海工作，轉眼便十年。上個月約滿，她決定不續約，返美國陪伴父母，因我嫂過年前入了深切治療室，雖然現已出院在家，但未清楚病源，亦未知如果醫治，姪女要回家再商討處理辦法。

她三月底回港，短留個多月，下星期便返美。期間有獵頭公司邀她往北京工作；她說道：「如果是半年後(即是她處理好家事之後)，我或者會考慮！」反正她表示現在已經可以提早退休。四十多歲便可退休，是多少人夢寐以求的事；但不要忘記，她是work hard, play hard之人，她做十年，可能等如別人工作了廿年！

上個星期，香港天昏地暗。當時我問：「今個星期有冇約人行山？」她每次回港，最少都會相約在港時的書友仔、舊同事行一次山。

姪女：「冇呀！都唔知啲咩嘢人嚟，天色暗啲啫，就話驚會落雨淋濕身，會病喎！」唔識得帶傘咩？

我：「我上次跟書友仔從將軍澳行去科技大學，果日抵步前開始下雨，我地連傘都冇，咪一樣咁行，咁易淋病咩(真係冇人病喎)？依家啲人越係錫身，身子越差，遲啲想唔俾人叫東亞病夫都唔得！」

昨日陽光普照，我又問佢會唔會行山？佢答：「人地驚住晒親會中暑喎！約左去行又一城。係咪有專線小巴去又一城架？」

我：「有！就響樓下搭2號小巴。」

姪女：「我同學住響北角，佢話嚟呢度會合，再一齊去又一城。但係我講極佢都話唔知7-11位置，佢堅持搭106過海，要我去觀音廟果個站接佢。」

我：「佢住響北角，由北角搭港鐵咪直接去倒又一城囉！何必多此一舉，要嚟紅磡會合呢？」

姪女：「我都唔明！」

同是香港「本土」人，祇是唔同地方成長，何解思想咁大差異？各位家長：唔該思考吓啦！