去核廢墟走一趟

2016/05/10 06:42:46 網誌分類: 旅遊
10 May

1986年4月26日,人類應該永遠記得這一天,因為這天烏克蘭切爾諾貝爾核電廠發生大爆炸,至今核災30年,核輻射後遺症仍未能完全清除。

去切爾諾貝爾參觀不難,因為今天災區已開放給公眾遊覽,不過因為基於安全考慮,一定要j跟當地旅行團,要跟住個導遊走,唔可離團,誤闖一些隔離危險的區域,而且一定要穿著長袖衫長褲,唔可以著拖鞋涼鞋呢類露趾嘅鞋,唔可以在一些檢查點和安全設施同影相。

出發那天,晨早8點半,一行人準時在基輔市中心廣場集合,同團有來自世界各地,例如日本、英國、澳洲、美國等地的朋友,導遊叫Igor,在車上和我們說切爾諾貝爾嘅幅射,其實只係比基輔高少少,叫大家放心,經過check point之後,兩小時後,我們就經過了4號核反應堆,同附近城市普里比亞特(Pripyat)。

Igor喺途中同我哋講,30年前,過萬名嘅Pripyat居民,因為4號核反應堆嘅致命性爆炸,要漏夜倉促地撤離自己嘅家園,自此當年熱鬧無比嘅Pripyat,就淪為今天的鬼城,與世隔絕。

一路上,我們見到前蘇聯統治嘅痕迹,佈滿城內每一個地方,城內大部份嘅建築物,受盡風吹雨打,磚牆疏於維修,漆油都已剝落,泳池內嘅大鐘停止轉動,原本計劃在30年前勞動節開幕嘅遊樂場,只剩下幾架爛溶溶嘅碰碰車同摩天輪,而學校、診所、戲院內,空無一人。

Igor帶我哋去出事嘅4號核反應堆外圍,同我哋講新石棺將會喺今年年尾落成,冚住日久失修嘅舊棺。喺嗰刻,我個一直無響過嘅黃色geiger counter突然「嗶」一聲,原本show出嚟嘅0.30Sv/h輻射量,突然飆升去到3.59Sv/h,嚇到所有人呆了一呆,不過Igor即刻安撫大家,話呢個輻射量,對短暫停留喺度嘅人嚟講無乜影響。

行咗大半日,我哋行上了一幢有成20層高嘅住宅,可以睇晒成個Pripyat同4號核反應堆,估唔到上到去一睇,發現所有大廈嘅側邊,全部都生滿晒密密麻麻嘅大樹,樹多過屋。

行完成個trip,我們個個人的心情都好複雜同好沉重,一直喺度諗,核能算唔算係一個「永遠嘅潘朵拉盒子」,就喺嗰個moment,喺我哋眼前,有4至5隻野鹿奔跑而過,由馬路跑入樹林,原來喺過去嘅30年,這裡已經由一個繁榮嘅城市,還返畀大自然,慢慢成為野生動物嘅天堂。

回應 (0)
我要發表
user