灣仔榮興小廚

呢兩個月，我個肚好忙碌！除左要捨命陪姪女，食盡黃埔區外，有咁啱舊同事又分別約左聚會；聚咩嘢會吖，咪不離食、食、食！

一方面講到香港飲食業步入寒冬，但睇嚟又唔多似喎！我地四人幫約左響今個黑色星期五聚餐，舊同事響香港島灣仔區訂檯，間間都表示晚飯分兩個時段：六點同八點半，但上半場八時十分要交檯。因為有兩位舊同事尚未退休，所以我地一向約七時半晚飯，呢兩個時段無論上、下半場都唔係咁啱，最終惟有改去會所食---貪佢冇時限囉！

尋晚約左另外一個四人幫晚飯，朋友建議去灣仔「榮興小廚」。舊同事打去訂檯的時候，該店一樣表示分兩個時段，期後得知我地訂嘅係星期一，才表示冇問題。吓！依家真係咁好景咩？

淨係睇個店名，還以為是茶餐廳！位於灣仔W Square 1字樓--集成與七海中心之間。

我第一個到達(睇開啲啦！鬼叫我係御用閒人咩)，真係唔多似酒樓，不過都算乾淨企理：

當時六點鐘，冇咩嘢客，我揀左個窗口卡位坐：

六時十五分，由於其中一位舊同事尚未到達，朋友建議叫個「沙薑雞腳」食：

個人認為：雞腳入口好稔，但不知何解，裡面啲筋尚未夠稔！味道唔錯。

朋友來過幾次，佢話「鮮蝦荷葉飯」與「老火湯」一定要柯打，遲了便售空。他與其他朋友光顧，必定會預訂。

尋晚係：龍脷葉雪梨雞腳湯，好味！每人有兩碗。

「鮮蝦荷葉飯」：驚死冇！一早叫定，結果食完啲餸，個飯都唔熱咯！好彩侍應好樂意幫我地再蒸熱佢，好食、亦唔油膩！不過食唔晒(有八小碗飯)，四個人叫左五樣嘢、—個荷葉飯，一個小食加個湯---太過份啦！結果要打包半個荷葉飯。

「薑蔥蠔」：少有地加左唔少枝竹！味道好好。

「梅菜炒芥蘭」：「梅菜菜心」食得多，未見過炒芥蘭，咁咪要試吓囉！朋友太太食後表示，以後響屋企都可以試吓整呢味餸。

「炸豆腐竹笙火腿」：好味！將竹笙與金華火腿釀進豆府內炸，食過未？好食！

「椒鹽鯪魚球鮮魷」(可以淨係叫「椒鹽鮮魷」)：好食！雖然係炸物，但係唔油。

「蔥油炸子雞」：好食！不過差不多食完至醒起未拍照。

食完有糖水送：「腐竹雞蛋薏米」。少有咁用左熟薏米煲，口感又幾得意！

埋單幾錢？唔知，因為唔係我找數，祇知道要過千！找數果位同事話唔貴喎，咁睇佢嘅菜牌都唔算好貴嘅。而且值得一讚嘅除左食物之外，係服務，全店由上至下都好親切，好好笑容。

我地離開時約晚上九時，成店都得四成客！可能淨係五、六、日客人較多掛。

離開時，其中一位朋友告知大廈後巷有間叫「後街牛扒」，中午$88任食牛扒喎！於是跟佢入後巷睇吓：晚餐係$138任食。我問朋友食過未？佢答食過，質素都OK喎！但係我地行入後巷時，燈光好暗，不過我時運低，見倒大大隻「小強」反晒肚瞓響條巷度，出嚟果陣又見倒另一隻大大隻嘅「小強」，大模斯樣響度巡視業務，我對此店嘅衛生程度真係有懷疑！店員見我地響度望，仲雞咁腳走出嚟派咭片添。不過，我唔會試囉！