人窮志不可以窮

做我地物業管理這一行，認真不容易做，住客千奇百怪，乜人都有，有天收到一個投訴，話有一位女住客個電話俾清潔工偷左，而家響度大吵大鬧，作為物業經理，我當然即刻要去處理。

去到村巴大站位置，只見一個穿著全身名牌既女人，以君臨天下既姿態，糸度鬧緊個清潔工人，旁邊仲有村巴司機，同另一位管業主任響度，佢地不發一言，只係頭耷耷咁系到聽個女住客訓示。

被人話偷電話既清潔工人叫群姐，六十幾歲，每一日返工都好有禮貌咁同每一位住客講早晨，我仲記得上年端午節，佢仲送左親手做既粽俾我食，而佢響屋苑已經工作左五年。

我立刻上前理解發生左咩事，同事話我知個女住客話，坐完村巴之後返屋企，發現部電話唔見左，落去村巴既時候，就發現群姐啱啱清潔完車廂，上去村巴揾既時候，就發現電話唔見左，於是一口咬定糸群姐偷左部電話。

女住客潑婦罵街咁話：「呢啲咁既清潔工，每個月搵得嗰幾千蚊，佢偷左我部電話賣出去，就成個月唔駛做，而且我仲親眼睇住佢響架村巴落黎，之後部電話就唔見左，仲唔係佢偷！」

群姐欲言又止，唔知佢係唔系受到委屈，只見佢雙眼通紅，眼淚係咁流，佢只係耍手擰頭咁講：「我冇….我真係冇…..」講完後喊得仲勁。

女住客得勢不饒人咁話：「你以為喊就有用咩？我部電話俾你偷左都未喊，呢度既樓幾萬蚊一尺，我買一個廁所等於你做幾年野，你窮咪窮囉，做人做到你咁cheap，要偷人野，我衣家要搜你身，你快啲攞返部電話出黎！」

講完，個女住客已經撲去群姐度，郁手想夾硬除低群姐個腰包來搜查。

當時我唔知係因為信群姐冇偷，又覺得個女人真系太過分了，冇証冇據，點可以冤枉人，又恃勢欺人，於是立刻阻止。

其他同事呆左冇反應，同事已經慣左被住客罵到一文不值，認為管理處或者係屋苑員工，就要俾住客為所欲為。

只見群姐塊面紅晒，我唔知佢係覺得反抗冇用，定係覺得反抗會攪到件事更加複雜，佢冇作任何反抗，任由女住客強搶佢身上既腰包。

群姐眼淚一滴滴咁響佢眼眶裡面流左出黎，我感受到佢既委屈，感受到佢因為窮而被所謂的有錢人羞辱得一文不值。

或許，呢一刻佢認為自己窮係原罪，又或者以為清潔工就可以被所謂有錢既人羞辱。響嗰下，我確切感受咩叫做忍氣吞聲，委曲求全。

當時不知那裡來的勇氣，我一手響個女住客既手上，搶返個腰包返黎還俾群姐，村巴司機同管業主任，見到我呢個行為都呆左響度。

個女住客好大聲咁鬧我：「你癲左呀，我要投訴你！」

我冇理個女住客，我只係行去群姐前面，問佢有冇偷電話，群姐好激動咁講話自己真係冇偷，仲對天發誓話如果偷電話，就不得好死。

我問群姐如果我現在報警，去證明佢既清白，佢介唔介意，群姐只係講一句：「我唔介意，我只係怕報警會麻煩到經理仔你。」

經理仔？我笑了一下，感覺有點窩心。我同女住客講，話佢唔可以系冇證據之下，就搶群姐既腰包來自己搜查，正確程序系報警交俾警察處理，如果警察都證明唔到電話係群姐偷既，女住客就要為剛才強搶群姐既腰包的行為道歉。

女住客聽完之後，用電話拍低條片，話要投訴我包庇下屬，狼狽為奸，仲話會去總公司投訴我。

群姐聽到之後，立刻話佢願意俾腰包個女住客搜查，我知道群姐咁做係想保護我，不想我被上級留難，但我想群姐知道，呢個唔係單單有冇偷野既問題，任何人都不可以在無證據之下就屈人偷野，重夾硬搜人身，狗眼看人低。

警察CID 黎到落口供，攪左成日，睇返村巴入面既閉路電視，發現原來女住客在上村巴時，自己跌左部電話響街度，最後俾街坊執到，交左個電話俾商場既保安員（村巴站響商場，由其他公司管理）。

最後，女住客當然冇同群姐道歉，佢只係好心急咁走去商場攞返部電話，完全冇理會我地。

群姐好開心咁同我講：「多謝你信我呀，經理仔！我未見過有屋苑經理會咁保住我地D清潔工…」

做我地物業管理呢行，的確會成日俾人羞辱，俾人問候祖宗十八代，係家常便飯，有時只可以選擇唯唯諾諾，或者一笑置之，做得呢行，預左。

但人窮志唔可以窮，我情願守護自己做人的正義感，即使被人投訴，都唔想因為怕事而午夜夢迴。