櫻花蝦蒸水蛋

上個月肚皮太放肆，我講左等姪女返美後要食清啲補數。我份人坐言起行，嘩！今個月每餐肉都唔多一兩，希望減番啲脂肪等九月啦----姪女講佢九月回港，因為上海舊同事響日本沖繩結婚，佢會經一經香港再去日本喎。

我覺得乾嘅櫻花蝦與響上海南貨店出售嘅「蝦皮」食味、口感都差不多，不過，後者便宜得多！論營養價值可能一樣----補鈣。祇不過蝦皮較櫻花蝦便宜，通常五蚊一包，可用多次，櫻花蝦則色澤靚啲。櫻花蝦乾依家好多地方有得賣，譬如：「？上」啦！

材料：

蛋三隻

櫻花蝦乾一小碗

蔥花(冇咪唔用囉)

一. 櫻花蝦乾略洗掠乾，放白鑊內用小火烘至乾身、輕身兼有小小脆身。

二. 蛋加水225毫升打勻，下鹽半茶匙、糖1/3茶匙打勻，用篩隔過。臨蒸前拌入櫻花蝦(蝦會浮面)，中火蒸約七分鐘。

三. 開鑊蓋洒上蔥花，稍蓋上焗一吓，淋上橄欖油及蒸魚豉油即成。

註：如沒有橄欖油，便要在蛋差不多蒸熟前，另外煮適量熟油，待蛋蒸熟時開蓋，洒上蔥花，並淋上熟油及蒸魚豉油。