陸羽仁周記
陸羽仁周記
陸羽仁周記

兩大惡股

2016/05/23 08:42:39 網誌分類: 經濟
23 May
        美國聯儲局無嗱嗱放鷹,話如果經濟勢頭持續,六月份有條件加息,加上內地A股連番試底,恒指上個星期認真難玩。雖然港股收市前反彈過百點,但交投薄弱,全日成交不足600億元。全周恒指升133或0.67%;國企指數一周微升2點或0.02%。美股方面,杜指上周五收報17500點,升65點。

        過去一個星期,市場最熱議話題係聯儲局文件突然放鷹,話美國經濟勢頭好,唔排除六月份加息,語氣同先前講加息可能比預期遲轉咗調,令人擔心全球市場水頭不足狀況,會因此惡化。摩根大通的美國證券策略師DubravkoLakos-Bujas就提醒佢嘅客戶,周三的議息記錄顯示出聯儲局對加息的態度已經「鷹」好多,令此前的平衡狀態添上風險。而據新興市場投資基金研究公司(EPFR)數據顯示,5月5日至11日,中國市場淨流出8.83億美元,美國市場仲多,淨流出18.32億美元。大行美銀美林的報告也顯示,全球股票基金上周資金淨流出74億美元,過去五周總計流出440億美元,創下近5年來新高。而股市今年迄今為止回報率只有1%,遠不及債券的7%及大宗商品期貨的11%。

        官員提起港鐵領展就頭痛

        有新債王之稱的基金經理JeffreyGundlach認為,聯儲局改變了今年加息需要的前提條件,從「如果數據模式好轉,我們就會加息」,變為「除非數據模式惡化,否則就給加息放行」,意味加息機會上升中。從呢班大戶的言論,顯示佢哋已對市場風險提高咗警覺。

        上個星期,港鐵(066)召開股東會,主席馬時亨表示,面對公眾要求減票價壓力,亦要面對持份者要求保障利益,所以現階段亦未承諾會減票價,形容董事局在票價調整問題上,因涉及民生議題,要衡量各方利益,公司難以自行解決,要尋求政府協助,佢仲形容自己是「跟著矛盾去開會」。聽聞,港鐵先為高鐵項目與政府拗數,跟住輪到票價機制駁火,因此已被政府高層列為兩大惡股之一。馬時亨做事一向面面俱圓,相信佢識點樣拆彈嘅。反而係另一隻惡股領展(0823),同政府點樣過招,對股價有乜影響仲未清楚。

        江湖依家傳聞政府眼中嘅兩大惡股,前身都係政府資產,港鐵前身係政府嘅鐵路公司,合併上市變成壟斷生意,雖然政府仲有七成半股權,但管理層就揸住兩成半小股東做盾牌,經常同高官過招,政府支矛點利,都總係攻唔破呢個擋箭牌,所以馬時亨話帶住矛盾去開會,講嘅唔止係佢,仲有坐係董事局嘅港官。

        橫行香港只怕花旗鷹

        至於另一隻領展仲大鑊,佢本來係房委會嘅大部份商場同車位營運者,但上市時當局一股都賣清,本來以為咁樣就乾手淨腳,唔關自己事,點知就變咗甩繩馬騮無王管。去年起,領展賣咗幾個場出嚟畀炒家,新業主將啲車位高位拆散炒番出去,同時新場唔係大加租,就係停業唔做,部份仲向社福機構開刀,搞到天怒人怨。早排有議員同示威人士拉隊去抗議,管理層搞到想話去攞禁制令。議員同市民抗議無門,就入晒政府數,所以官府一聽到呢間公司,就頭都痛埋,講明日後有乜事,都要對佢揸到正一正嚟做。

        從做生意角度嚟講,呢兩隻惡股可以連政府都話頂佢唔順,可見佢哋實力驚人,皆因佢哋市值大,資源多,唔怕同政府打官司,尤其係領展,似乎睇通政府奈佢唔何,所以有人話,惡股唔怕買,就算有買貴都無買錯。呢個分析聽落唔係無道理,不過,惡股就算點惡,都惡唔過聯邦儲備局,佢哋嘅業務不約而同,都有好重嘅地產成份,都對息口相當敏感,若然利率向上,對佢哋點都有衝擊,所以就算佢哋係香港點樣稱王稱霸,撞到聯儲局放鷹,短期都會窒一窒。

        見張德江無人selfie

        人大委員長張德江來港視察,話題之一係佢今次特別約咗一班粉絲影大合照,結果係佢講話之際,有位年紀較大嘅粉絲頂唔順要坐輪椅離場。

        北京領導人事隔多年重臨香港,由於跑馬仔已暗暗拉開序幕,大家都關心張德江會唔會有貼士,佢一到香港,立即到政府總部會見問責班子和常務秘書長。領導人與管治班子拍照前,先行握手,外界自然細數他與接見人士的握手狀況,有沒有特別,希望見微知著,看出一點端倪,由於會見官員沒有傳媒在場,所以要翻看新聞處影片。有人綜合幾個場合的片段,結論是委員長握手手法相當純熟一致,基本上不易看出差別,唯獨是會見立法會主席曾鈺成時,似乎多幌了兩下,不排除曾主席過去率領立法會訪問團到過廣東,與張德江一早認識,握多兩吓,斷估唔係叫佢選特首啩。

        攝影過程嚴謹

        見完高官,臨離開前,張德江約咗建制粉絲大合照,除了政協等有職銜人士,商界都唔少,銀行界就有東亞主席李國寶同渣打洪丕正,反而做咗南豐總裁嘅疑似特首黑馬梁錦松就唔係好覺眼。影完呢次相,臨走前張德江又被人影到佢同特首梁振英握手,呢次仲話足足有五秒咁耐,咁究竟係代表咗領導人好想支持特首,抑或特首好想領導人支持佢,大可各自演繹啦。

        以往隨團上京見領導人,拍照環節有專用攝影師,過程相當嚴謹。今次港府做法,都有啲似北京,整個過程相當嚴謹,參加者唔可以周圍走,當日出席者都係見慣大場面嘅頭面人物,無乜出位動作。陸羽仁之前聽過曾經帶團嘅商界高層講,依家人人都玩手機,有人連見到內地官員都照玩,有次有團見到上海大員韓正,膽粗粗走去同韓正嚟個selfie,仲要走到鬼咁近,搞到韓大人有啲面阻阻。同樣情況,有時甚至係訪京團都會偶然出現,不過只要唔係企得太埋,同樣手腳快啲,聽講領導人而家都好明白玩手機係潮流,都會識做詐睇唔到嘅。

        陸羽仁

        
回應 (0)
我要發表
user